Na fonie masavych akcyj pratestu ŭ Polščy, vyklikanych amal poŭnaj zabaronaj na aborty ŭ krainie, biełaruskija dziaržaŭnyja prapahandysty pačali aktyŭna aśviatlać hetuju temu. U efiry BT zajaŭlajuć, što Polšča nibyta stała achviaraj ułasnych «revalucyjnych mietadyčak», što dla zachodniaj susiedki charakternyja dvajnyja standarty, i ŭvohule, zamiest taho, kab vučyć žyćciu Biełaruś, niachaj Polšča ŭ siabie paradak naviadzie.
Padziei ŭ Polščy dla biełaruskich prapahandystaŭ rehularna kamientuje «palitołah» Matevuš Piskorski. Svaju palityčnuju karjeru jon pačynaŭ u ŭltrapravych i nieapahanskich ruchach. Časopis Odala, jaki Piskorski vydavaŭ na praciahu 90-ch i na pačatku 2000-ch hadoŭ, nieadnarazova publikavaŭ artykuły, u jakich admaŭlałasia isnavańnie Chałakostu.
Akramia taho, Piskorski apraŭdvaŭ dziejańni Treciaha rejcha i zaklikaŭ stvaryć «Słavianskuju impieryju», nazyvajučy jaje «adzinaj nadziejaj dla biełaj rasy», adznačaje The Times.
Z pačatku 2000-ych hadoŭ rehularna naviedvaŭ Rasiju, dzie sustrakaŭsia ź miascovymi nieanacystami. Piskorski maje antyhłabalisckija, antyamierykanskija, antykapitalistyčnyja i jeŭrazijskija pohlady. Piskorski niekalki razoŭ byŭ naziralnikam na biełaruskich vybarach.
U 2014 hodzie jon byŭ naziralnikam na «refierendumie» ŭ Krymie. Taksama Piskorski rehularna kamunikavaŭ ź sieparatystami na ŭschodzie Ukrainy, jakich padtrymlivaje Rasija.
U mai 2016 hoda jaho zatrymali polskija śpiecsłužby pa abvinavačvańni ŭ supracoŭnictvie z rasijskaj i kitajskaj raźviedkaj.
Amal 3 hady jon prasiadzieŭ u izalatary. 16 maja 2019 hodu jaho vypuścili z varšaŭskaha śledčaha izalatara pad zakład da vierdyktu suda.
Akramia supracoŭnictva ź biełaruskimi dziaržaŭnymi ŚMI, Piskorski rehularna kamientuje padziei ŭ Polščy dla rasijskich prapahandysckich miedyja.