Horadzienskaha doktara historyi Alesia Smalančuka zatrymali padčas maršu salidarnaści ŭ Horadni 20 vieraśnia, piša «Svaboda».
Jaho zaviali ŭ aŭtazak adnym ź pieršych, na Vilenskim zavułku. Tam adbylisia asnoŭnyja zatrymańni siońnia.
Jaho samoha nia bili, ale jon bačyŭ mažnaha mužčynu, jaki lažaŭ na padłozie ŭ aŭtazaku biez prytomnaści. Potym bačyŭ jašče adnaho chłopca, jakoha pabili pry zatrymańni. Toj skardziŭsia, što balić bok, nibyta złamanaja rabryna, i pabity łokać.
Aŭtazak z 14 ludźmi, dzie byŭ Smalančuk, pryvieźli ŭ Kastryčnicki RAUS. Mužčyn pastavili tvaram da ściany. Žančyn trymali asobna.
«Kali ciahnuli, to hareli ŭ chłopcaŭ vočy… A potym padkreślenaja vietlivaść. «Pavietra niama», — niechta kryčyć. Uklučajuć pavietra ŭ aŭtazaku. Žančynam davali vadu. U RAUS razmaŭlali na «vy», — kaža pra ŭmovy historyk.
Kali milicyjanty daviedalisia, što pierad imi prafesar Varšaŭskaha ŭniversytetu, to akcentavali na hetym uvahu. «Vam, napeŭna, zaraz premiju ŭ Polščy vypišuć? Heta ja pytajusia z čystaj cikaŭnaści», — zhadaŭ słovy milicyjanta Smalančuk.
Jon vyrašyŭ nie adkazvać na takoje pytańnie.
Historyku prapanavali pahutaryć, ale jon adkazaŭ: «Vy nie zrazumiejecie».
Urešcie Smalančuku vypisali administracyjny pratakoł za ŭdzieł u niedazvolenym masavym mierapryjemstvie i adpuścili.