Kiraŭnik MZS Litvy Linas Linkiavičus. Fota Nadziei Bužan
Litva, jak i Jeŭrapiejski sajuz, nie pryznaje vyniki praviedzienych u žniŭni prezidenckich vybaraŭ u Biełarusi, a takim čynam nie moža ličyć Alaksandra Łukašenku zakonnym lidaram, abranym narodam. Pra heta TUT.BY zajavili ŭ MZS Litvy.
Siejm Litvy 10 vieraśnia vypuściŭ rezalucyju, u jakoj eks-kandydat u prezidenty Biełarusi Śviatłana Cichanoŭskaja i Kaardynacyjnaja rada nazvanaja adzinymi zakonnymi pradstaŭnikami biełaruskaha naroda. Taksama ŭ rezalucyi Alaksandr Łukašenka nazvany «nielehitymnym biełaruskim lidaram».
U MZS Litvy adznačajuć, što Litvu i Biełaruś źviazvaje nie tolki hieahrafičnaje susiedstva.
— Naša kraina adčuvaje emacyjnuju blizkaść ź ludźmi, jakija viaduć baraćbu za svaju svabodu ŭ Biełarusi. My viedajem, što suprać hetych ludziej prymianiajecca siła, jany padviarhajucca katavańniam. Litva, jak i Jeŭrapiejski sajuz u cełym, nie maje maralnaha prava zastavacca ŭ baku va ŭmovach, kali vidavočnym čynam falsifikujucca vybary, adbyvajucca maštabnyja parušeńni pravoŭ čałavieka i parušajucca demakratyčnyja kaštoŭnaści ŭ Biełarusi, — havorycca ŭ kamientary zamiežnapalityčnaha viedamstva.
U MZS ličać, što adziny šlach pieraadoleńnia palityčnaha kryzisu — pačatak dyjałohu z hramadzianskaj supolnaściu, jakoje pradstaŭlaje Śviatłana Cichanoŭskaja i Kaardynacyjnaja rada.
— My ličym Śviatłanu Cichanoŭskuju nacyjanalnym lidaram Respubliki Biełaruś. Litva zacikaŭlena ŭ raźvićci ŭsiebakovych dobrasusiedskich adnosin sa svabodnaj, suvierennaj i demakratyčnaj Biełaruśsiu, — zajavili ŭ MZS.
