Padčas tranślacyi pasłańnia Łukašenki ŭ kadr traplali nie tolki siłaviki, deputaty i čynoŭniki, ale i maładaja pryhažunia, jakaja raźmiaściłasia ŭ pieršych šerahach.
«Naša Niva» pacikaviłasia asobaj dziaŭčyny.
Pryhažuniu zavuć Kaciaryna Łajbis.
Jana rodam z Homiela (darečy, pobač ź joju siadzieŭ jakraz adzin sumna viadomy hamialčuk), ale žyvie i vučycca ŭ Minsku ŭ pieduniviersitecie imia Tanka.
U dziaŭčyny niezvyčajnaja śpiecyjalnaść: jana śpiecyjalist pa inkluziŭnaj adukacyi, to-bok pracuje ź dziećmi z asablivaściami raźvićcia.
«Jana sa škoły była aktyvistkaj, vałancioram. Skončyła škołu z załatym miedalom i ciapier sumiaščaje vučobu va ŭniviersitecie z pracaj u škole. Kaciaryna pracuje tjutaram u adnoj ź minskich škoł, dapamahaje dzietkam, — raspaviała «Našaj Nivie» mama dziaŭčyny. — Akramia taho, Kacia aktyŭny ŭdzielnik BRSM i zaŭsiody sustrakała Łukašenku, kali jon pryjazdžaŭ u Homielskuju vobłaść. Jana i śpiavaje, i zdymajecca jak madel, i aktyvistka, i finalistka konkursu pryhažości «Mis Biełaruś-2018» — tamu jaje paŭsiul i zaprašajuć.
Sioleta jana była ŭ Aleksandryi, naprykład. Karaciej, dzie na masavych mierapryjemstvach Alaksandr Ryhoravič — tam i Kacia. Vielmi hanarusia dačuškaj majoj!»
«Naša Niva» źviazałasia i z samoj Kaciarynaj Łajbis, ale dziaŭčyna nie zachacieła dzialicca ŭražańniami ad vystupu Łukašenki.
«Usio ŭžo raspaviała «Sovietskoj Biełoruśsii», prabačcie. Čytajcie tam, usio tam ekskluziŭna», — adkazała jana.
Ale ž u telehram-kanale «Niechta» źjaviłasia infarmacyja ad nibyta znajomych Kaci: što dziaŭčyna była ŭ adpačynku i nie chacieła prysutničać na pasłańni, ale jaje abaviazali ŭdzielničać. Inakš nibyta buduć prablemy na pracy.
Łajbis heta abviarhaje:
«Ja čytała, heta pravakacyja i niapraŭda. Dla mianie heta zaŭsiody pryjemnaja prapanova».
Hałasavać dziaŭčyna taksama źbirajecca za Łukašenku.
«Kaniečnie, hałasavać budu za Alaksandra Ryhoraviča. Bo za im stabilnaść», — adkazała Kaciaryna.
