Medyk-biełarus, hramadzianin Estonii, Mikoła Iljin zahinuŭ 13 lipienia na Danbasie padčas abstrełu prarasiejskimi separatystami. Jon u hrupie ŭkrainskich vajskoŭcaŭ sprabavaŭ evakujavać z «šeraj zony» cieła bajca, jaki padarvaŭsia na minie, piša radyjo «Svaboda».
22 lipienia ŭ kijeŭskim kaściole śviatoha Alaksandra prajšła imša pamiaci Mikoły Iljina, jakoha zatym kremiravali. Dniom raniej hramadzianskaja panichida pa zahinułym adbyłasia ŭ Biełarusi, u mahiloŭskim katedralnym kaściole.
Pavodle apošniaha žadańnia Mikoły Iljina jahony prach mieŭsia być raźviejany ŭ troch krainach: Ukrainie, Biełarusi i Estonii. 24 lipienia volu Mikoły blizkija vykanali na Dniapry va Ŭkrainie.
26 lipienia nad Dniaprom u Mahilovie, dzie Mikoła Iljin naradziŭsia i žyŭ z maci da 2006 hoda, jahony zapaviet taksama vykanali. Raźvitańnie adbyłosia ŭ kole rodnych i blizkich paplečnikaŭ pa apazycyjnaj dziejnaści.
«Ja tak hanaryłasia, kali ŭ mianie naradziŭsia chłopčyk, i tak maliłasia za ŭsich dziaciej, jakich čakajuć maci. A moj Mikoła ad mianie syšoŭ. Ja nie mahu pavieryć, što jaho bolš niama ŭ mianie», — kazała maci Iryna Michajłaŭna, paśla malitvy.
Mikoła Iljin udzielničaŭ u apazycyjnych moładzievych arhanizacyjach «Małady front», «Zubr». Paśla płoščy 2006 hoda źjechaŭ va Ŭkrainu sa spadzievam atrymać hramadzianstva, ale damahčysia hetaha jamu nie ŭdałosia. Z Ukrainy z dapamohaj ukrainskich valanteraŭ pierabraŭsia ŭ Estoniju. Tam vyvučyŭsia na medyka. Va Ŭkrainu viarnuŭsia, kab dapamahčy ŭkraincam u baraćbie za terytaryjalnuju cełasnaść krainy.
