Hleb Budkoŭ (u centry) u sudzie, 6 lipienia 2020 hodu
U Mahilovie sudziać 26-hadovaha Hleba Budkova za toje, što jon vyjšaŭ 3 lipienia ź bieł-čyrvona-biełym ściaham na plac pierad harvykankamam, piša «Svaboda».
Mužčynu vinavaciać u arhanizacyi niesankcyjanavanaha pikietu (2 č. artykuła 23.34 Kodeksu ab administracyjnych pravaparušeńniach). Dvoje sutak jon pravioŭ u izalatary časovaha ŭtrymańnia, a 5 lipienia sudździa Leninskaha sudu Viktoryja Palakova nakiravała spravu ŭ Leninski adździeł milicyi na dapracoŭku.
Pra Hleba Budkova. Ścisła
- Naradziŭsia ŭ Białynickim rajonie. Biespartyjny. Skončyŭ dva z pałovaj kursy Mahiloŭskaha ŭniversytetu imia Kulašova.
- Nieŭzabavie paśla słužby ŭ vojsku znajšoŭ pracu ŭ Belhii. Tam pracavaŭ na budoŭlach.
- Viarnuŭsia na radzimu ŭ suviazi z pandemijaj karanavirusu.
«Kali ciapierašni prezydent zastaniecca, Biełaruś čakaje stahnacyja»
U hutarcy sa «Svabodaj» Hleb Budkoŭ adznačaje, što bieł-čyrvona-bieły ściah ličyć «ściaham svajoj krainy», a vyjšaŭ ź im 3 lipienia, kab vykazać niezadavolenaść tym, što ciapier adbyvajecca ŭ Biełarusi.
«Jak abychodziacca ź ludźmi, jakich chapajuć prosta na vulicy za realizacyju kanstytucyjnaha prava na vykazvańnie ŭłasnaj dumki», — tłumačyć jon.
Budkoŭ kaža, što choča pieramienaŭ.
«Mnie 26 hadoŭ, i stolki ž Biełaruśsiu kiruje Alaksandar Łukašenka. Kali jon zastaniecca pry ŭładzie nadalej, to ničoha novaha nie pryŭniasie ŭ raźvićcio — i krainu čakaje stahnacyja».
«Chadzić z rasiejskim ściaham u Mahilovie možna, a ź biełaruskim nie?»
Surazmoŭca pryznajecca, što nie čakaŭ zatrymańnia, bo ŭ svaich dziejańniach nia bačyŭ parušeńnia zakonu. Jon kaža, što ŭ Mahilovie niejak bačyŭ padpitaha mužčynu, jaki chadziŭ z rasiejskim ściaham na piešachodnaj vulicy dy «z vyklikam vypytvaŭ u minakoŭ, ci nia suprać jany Rasiei», ale jaho nie zatrymali.
Budkoŭ ža prastajaŭ ź bieł-čyrvona-biełym ściaham kala handlovaha centru «Atryjum», dzie prachodzili vybarčyja pikiety vyłučencaŭ na prezydenctva, blizu hadziny. Pavodle jaho, minaki nia stavilisia da jaho varoža. Niekatoryja paśla rospytaŭ chacieli ź im sfatahrafavacca.
«U milicyi jość niakiepskija ludzi»
U sudzie vyśvietliłasia, što Budkova na placy pierad harvykankamam paŭhadziny zdymali na videa milicyjanty. Zatrymali jaho supracoŭniki ŭ cyvilnym, a amapaviec zavioŭ u słužbovuju mašynu.
«U adździele milicyi niekatoryja supracoŭniki kazali, što ŭ mianie pryhožy ściah, — zhadvaje jon. — Adzin ź milicyjantaŭ pahadziŭsia z majoj dumkaj: kali ničoha biełarusam nie rabić, to biełaruskaja mova, kultura i dziaržaŭnaść źniknuć, jak i sam narod».
Surazmoŭca ličyć, što «nia ŭsie ŭ pravaachoŭnych orhanach kiepskija ludzi». Na jahonuju dumku, jany apynulisia ŭ sytuacyi, kali vymušanyja vykonvać zahady, jakija im nie padabajucca.
«Ale i jany musiać razumieć, što za svoj zarobak pradajuć budučyniu svaich dziaciej i što ad ichnaj pazycyi mnohaje zaležyć u krainie», — dadaje Budkoŭ.
Čamu kinuŭ vučycca i pajechaŭ u Belhiju
Hleb Budkoŭ skončyŭ dva z pałovaj kursy fizyka-matematyčnaha fakultetu Mahiloŭskaha ŭniversytetu imia Kulašova. Kaža, što pajšoŭ tudy vučycca, bo ŭ škole matematyčnyja dyscypliny davalisia jamu dobra. Potym zrazumieŭ, što nastaŭniki žyvuć nie zamožna, a niekatoryja navat biadujuć, tamu kinuŭ vučycca.
«Dla maładoha čałavieka žyćcio ŭ Biełarusi biesperspektyŭnaje, — kaža surazmoŭca. — Ciažka raspačać biznes, damahčysia ŭ niečym pośpiechaŭ. Hramadzianie biezabaronnyja pierad dziaržavaj. U luby momant načalnik moža vykinuć ciabie z pracy. Asabliva ciažka maładoj siamji. Daviadziecca ŭsio žyćcio źbirać hrošy na toje ž žyllo».
U Belhiju jon pajechaŭ, bo «heta kraina sa stabilnaj zamožnaj ekanomikaj». Tam adrabiŭ paŭtara hoda mantažnikam na budoŭlach. Skančeńnie pracoŭnaj vizy supała z pandemijaj karanavirusu, tamu viarnuŭsia na radzimu. Ciapier žyvie z taho, što zarabiŭ za miažoj.
«Tam asabliva pracy nie było, — zhadvaje jon. — Budaŭničyja arhanizacyi začynialisia, tamu vyrašyŭ viarnucca ŭ Biełaruś i tut pierasiedzieć karanavirus. Spadziajusia pajechać tudy znoŭ».