Novym zahadam Ministerstva achovy zdaroŭja ad 1 lipienia №690 ab lačeńni pacyjentaŭ z karanavirusnaj infiekcyjaj udakładniena, kaho z COVID-19 buduć kłaści ŭ balnicu, piša tut.by.
Pavodle novaha zahadu špitalizavać buduć u vypadkach:
1) siarednieciažkaj i ciažkaj chady COVID-19 (abo padazreńni na jaje) pry najaŭnaści faktaraŭ ryzyki i/abo nieabchodnaści pryznačeńnia lekaŭ hidraksichłorachin;
2) vostraha reśpiratornaha dystres-sindromu ź infiekcyjaj COVID-19.
Raniej, pavodle papiaredniaha zahadu №615 ad 5 červienia 2020 hoda, špitalizavali pacyjentaŭ ź pnieŭmanijaj ź infiekcyjaj COVID-19 (abo padazreńniem na infiekcyju COVID-19) abo vostrym reśpiratornym dystres-sindromam ź infiekcyjaj COVID-19. Pry hetym stupień ciažaru chady pnieŭmanij u spałučeńni z COVID-19 nie ŭdakładniałasia.
Pavodle novaha zahadu pacyjentam sa siarednieciažkaj formaj COVID-19 biez faktaraŭ, što abciažarvajuć chadu pnieŭmanii, miedycynskaja dapamoha moža akazvacca doma pry zabieśpiačeńni dynamičnaha nazirańnia. Adnak važna razumieć, pra što idzie havorka. Pad siarednieciažkaj formaj karanavirusnaj infiekcyi majecca na ŭvazie situacyja, kali ŭ čałavieka niaciažkaja pnieŭmanija i majecca paraza nižnich dychalnych šlachoŭ, pry hetym niama dychalnaj niedastatkovaści i prykmiet parušeńnia ŭnutranych funkcyj orhanaŭ, zachavana śviadomaść, niama zamarudžanaści, častata dychalnych ruchaŭ nie bolš za 22 u chvilinu, častata sardečnych skaračeńniaŭ bolš za 55 i mienš za 110 udaraŭ u chvilinu, niama bolu ŭ hrudnoj kletcy i kryvacharkańnia, pracent nasyčeńnia kryvi kisłarodam nie mienšy za 95, sistaličny arteryjalny cisk vyšejšy za 90 mm rt. sł. Taksama važnyja peŭnyja paramietry ŭ analizie kryvi.
Da siarednieciažkaj chady karanavirusnaj infiekcyi taksama adnosicca situacyja, kali ŭ čałavieka VRVI z tempieraturaj, vyšejšaj za 38,5 hradusa, kašlem, słabaściu i lichamankava-intaksikacyjnym sindromam.
Faktarami, jakija abciažarvajuć chadu pnieŭmanii ŭ pacyjentaŭ ź infiekcyjaj SOVID-19, ličycca viek pacyjenta, kali jon starejšy za 55 hadoŭ, i najaŭnaść choć by adnaho ź pieraličanych spadarožnych zachvorvańniaŭ: marbidnaha atłuścieńnia (indeks masy cieła bolšy abo roŭny 40), cukrovaha dyjabietu, chraničnaj kardyjavaskularnaj patałohii z sardečnaj niedastatkovaściu, chraničnaj patałohii lohkich (branchijalnaj astmy, chraničnaj abstruktyŭnaj chvaroby lohkich, bronchaektatyčnaj chvaroby, mukaviscydozu), złajakasnych navatvoraŭ, zachvorvańniaŭ, jakija lečać imunasupresiŭnymi, hlukakartykoidnymi lekami, transpłantacyi značnych orhanaŭ abo kaściavoha mozhu, VIČ, tubierkulozu, virusnych hiepatytaŭ, ankahiematałahičnych i sistemnych zachvorvańniaŭ złučalnaj tkaniny.
Nahadajem, što ŭ novym zahadzie taksama prapisana, kaho ciapier padčas płanavaj špitalizacyi ŭ balnicu buduć testavać na COVID-19. Naprykład, heta adnosicca da tych, kaho čakaje płanavaja apieracyja i ŭ kaho niama simptomaŭ VRVI.
