Maksim Bahdanovič
Kamisija ŭ administracyi Frunzienskaha rajonu admoviła mienčuku Maksimu Bahdanoviču, jaki chacieŭ stać siabram učastkovaj vybarčaj kamisii na prezydenckich vybarach, piša «Radyjo Svaboda».
«Ja liču, što mienavita takija ludzi i pavinny być u kamisijach»
Maksim Bahdanovič ź Miensku, ciapier vučycca ŭ Harvardzkim universytecie ŭ ZŠA. Jamu amal 19 hadoŭ, i jon staŭ znakamity historyjaj samastojnaha pastupleńnia ŭ adzin z najlepšych universytetaŭ śvietu.
Sioleta Maksim sabraŭ podpisy žycharoŭ svajho doma ŭ Frunzienskim rajonie i vyłučyŭ svaju kandydaturu va ŭčastkovuju vybarčuju kamisiju.
«Ja aktyŭny hramadzianin, — tłumačyć Maksim svajo rašeńnie. — Vielizarnaja prablema biełaruskich vybaraŭ — toje, što ludzi, jakija raniej byli ŭ kamisijach, mahli być va ŭraźlivym stanoviščy. Ci adnosna kiraŭnika kamisii, ci chtości moh na ich paŭpłyvać, nacisnuć. A ja absalutna niezaležny čałaviek! Ja liču, što mienavita takija ludzi i pavinny być u kamisijach».
Pasiedžańnie kamisii išło onłajn u suviazi z epidemijalahičnaj sytuacyjaj. Tamu, kaža Maksim, u jaho nie było mahčymaści realizavać svaje pravy.
«Zhodna z vybarčym zakanadaŭstvam ja, jak čałaviek, za jakoha padpisalisia ludzi, maju prava nia tolki prysutničać, ale i abaraniać svaju kandydaturu i zadavać pytańni. Ciapier u nas takoj mahčymaści nie było», — kaža jon.
«U vyniku «suprać» mianie prahałasavali siamiora, dvoje «ŭstrymalisia», i nul «za», — padsumoŭvaje Maksim.
Chłopiec kaža, što ŭpieršyniu ŭ žyćci za jaho nie prahałasavaŭ nichto. «Zvyčajna ŭ mianie była choć niejkaja padtrymka», — śmiajecca jon. Niadaŭna jon pahladzieŭ seryjał «Čarnobyl» — i paraŭnoŭvaje atmasferu pasiedžańnia kamisii administracyi Frunzienskaha rajonu z uznoŭlenym u amerykanskim seryjale savieckim časam. Kamisija ledźvie nie adnahałosna hałasavała «za» byłych siabraŭ vybarčych kamisij i hetak ža adnadušna — «suprać» alternatyŭnych pretendentaŭ.
«Adkul u Harvardzie charaktarystyka?»
Aktyŭnaść Maksima Bahdanoviča nie zastałasia niezaŭvažanaj. U pierapynku padčas žyvoj tranślacyi kamisija administracyi Frunzienskaha rajonu zabyłasia vyklučyć huk. Na zapisie čuvać, jak siabry kamisii abmiarkoŭvajuć ułasnaje hałasavańnie.
Žanočy hołas: Pačakajcie, a kali 8 «za», a adzin budzie suprać? Heta ž nia strašna?
Hałasy: Nie, narmalna, narmalna.
Žanočy hołas: Hałoŭnaje, kab nie za taho… (śmiech.)
Žanočy hołas: Kali ŭsie buduć kazać «tak», ja skažu «nie».
Mužčynski hołas: Student z Harvardzkaha ŭniversytetu sa stanoŭčaj charaktarystykaj… Ty ž razumieješ. Adkul u Harvardzie charaktarystyka? (śmiech, nierazborliva.)
Žanočy hołas: Cicha! Idzie žyvy efir, mnie pazvanili, skazali.
«Ja nikoli siabie tak dobra ŭ Biełarusi nie adčuvaŭ, jak ciapier»
Maksim raskazaŭ, jak rychtavaŭsia da pasiedžańnia.
«Napisaŭ pa-biełarusku bijahrafiju, što ja student takoha i takoha ŭniversytetu, što ja dapamahaju inšym vučyć matematyku, što ŭ škole ja byŭ u BRSM, što ja spaborničaju za fechtavalnuju kamandu, — kaža Bahdanovič. — Taksama ja paprasiŭ svajho amerykanskaha prafesara, jaki vykładaŭ kurs «Ekanomika i palityka rasiejskich reformaŭ u 90-ch», kab jon napisaŭ mnie charaktarystyku».
Maksim kaža, što na siońniašnim pasiedžańni nie ŭchvalili kandydaturu nivodnaha sa znajomych jamu ludziej, jakija samastojna vyłučylisia ŭ kamisiju. 24 červienia ranicaj jon razam ź inšymi budzie padavać skarhu na admoŭnaje rašeńnie.
Jaho taksama ździŭlaje, što admaŭlali pretendentam navat tady, kali ŭ kamisii nie było maksymalna mahčymaj kolkaści siabraŭ — 19 čałaviek.
«Čamu b nie pryniać usich? — pytajecca Maksim. — Čamu mianie sa stanoŭčymi charaktarystykami nie ŭklučyć u kamisiju?! Heta kantrast z tym, što ja baču ŭ Štatach. Ja nie hramadzianin, ale ŭ mianie ŭ horadzie, dzie znachodzicca ŭniversytet, pytajucca, jak horad pavinien vytracić hrošy. Kožnamu, chto tam žyvie, dasyłajuć biudžet, i ty možaš prapanavać, jak jaho vytracić. Ja da takoha pryzvyčaiŭsia».
Navučalny hod u Harvardzkim universytecie skončyŭsia miesiac tamu. Ciapier Maksim u Miensku i zajmajecca ŭ letniaj škole onłajn. Jak studentu, jakomu sam Harvard prapanoŭvaŭ finansavańnie, jamu miesca ŭ letniaj škole dali biaspłatna.
«Ja nikoli siabie tak dobra ŭ Biełarusi nie adčuvaŭ, jak ciapier, — kaža chłopiec. — Jość nievierahodnaje adčuvańnie abjadnanaści, šmat ludziej takich, jak ja, jakim heta važna. Jašče 128 čałaviek padalisia ŭ Frunzienskim rajonie, znajšli minimum 10 podpisaŭ. A heta ŭžo amal 1300 nieabyjakavych ludziej! Heta krutoje adčuvańnie!»
Chłopiec kaža, što sučasnyja technalohii dazvolili hetym ludziam pieraznajomicca «za 30 sekundaŭ», stvaryŭšy supolny čat.
«U mianie pakul vydatnyja ŭražańni ad vybarčaj kampanii, — kaža Maksim Bahdanovič. — Niama lepšaha miesca, dzie ja chacieŭ by być. Adčuvańnie hramadzianskaści, drajvu daje kryły. I mnie nia chočacca dalej hetyja kryły absiakać. Tamu ŭdzielničaju jak mahu».
