Piensijaniercy Alenie Dabradziej 60 hadoŭ. U Motali, što ŭ Ivanaŭskim rajonie Bresckaj vobłaści, žančyna ŭžo dva hady vyroščvaje ananas. Akazvajecca, jon moža raści i ŭ vazonie.
«U 2018 hodzie plamieńnik padaryŭ mnie na dzień naradžeńnia maleńki ananas u haršočku, — raspaviadaje Alena. — Niejki čas jon stajaŭ u mianie ŭ dvary, a potym ja vypadkova jaho złamała. Vyrašyła, što dzieci staralisia, daryli, tamu treba vyraścić novy. Tamu ŭ taho ananasa ja zrezała vierchavinu. Hladžu: a tam u jaho «dzietak» — mora! Tamu ja adrazu šmat vysadziła.
Potym mnie nadakučyła ź imi nasicca, i ja pakinuła tolki adzin. U 2018 hodzie jon u mianie stajaŭ na vulicy, u dom zaniesła tolki ŭzimku, u 2019 taksama stajaŭ na vulicy. I voś pierad hetym Novym hodam jon u mianie pačaŭ kvitnieć, a ciapier i vyras.
Ja ŭ internecie čytała, što zvyčajna ananasy pładanosiać tolki na treci-čaćviorty hod, a ŭ mianie voś niezvyčajna atrymałasia: vyras krychu bolš čym za dva hady. Dumaju, hetaj vosieńniu my jaho ŭžo źjamo».
Alena čytała, što na smak takija «chatnija» ananasy nie vielmi sałodkija, ale pry hetym vielmi duchmianyja.
«Ščyra kažučy, sioleta jaho možna było b užo vysadzić u aharod, kali stała ciopła. Ale ja nie stała. Jak palma jon raści nikoli nie budzie: jon nizieńki, niedzie paŭmietra. U internecie niadaŭna ja cełuju takuju ananasnuju płantacyju bačyła.
Kab u nas u Motali chto-niebudź taksama vyroščvaŭ ananasy, ja nie bačyła, ale niejak susied-santechnik ubačyŭ jaho ŭ mianie ŭ vazončyku i skazaŭ: «O, ja taksama taki vyroščvaju!»
Piensijanierka kaža, što dahladać raślinu nieskładana:
«Ja časta jaje apyrskvaju, ale ničym nie padkormlivaju. Adzinaje — časam u vadu mahu kinuć łupinu ad banana — hetaj vadzicaj jon dobra siłkujecca. Bolš nijakaj chimii — absalutny naturpradukt.
I da nadvorja jon nie pieraborlivy: prosta staić na soncy ŭ dvary. Ja, kali ščyra, navat i nie čytała, jak pravilna jaho dahladać, prosta pasadziła, a jon i raście.
Pa pamiery jon zaraz nievialiki: niedzie 10 na 10 sm. Uvosień budzie bolšy, viadoma, ale ja ź im nasicca bolš nie budu. Sprava ŭ tym, što navat pieršy ananas, jaki mnie padaryli, byŭ nievialiki. Moj ciapierašni ŭžo ŭdvaja bolšy za toj».
