Fota Maksima Machańkova
Hruzija adkryjecca 15 červienia dla ŭnutranaha turyzmu, a z 1 lipienia budzie hatovaja da pryjomu turystaŭ z-za miažy. Pra heta paviedamiŭ u čaćvier premjer-ministr respubliki Hieorhij Hacharyja padčas prezientacyi antykryzisnaha płana pa turyźmie, piša TASS.
«Va ŭrada Hruzii jość płan, i jon spraŭdzicca — z 15 červienia Hruzija adkryjecca dla pradastaŭleńnia pasłuh unutranaha turyzmu, a z 1 lipienia Hruzija budzie hatovaja da taho, kab pryniać zamiežnych turystaŭ. My heta zrobim jak šlacham stvareńnia kalidoraŭ biaśpieki na suchaputnych miežach z susiednimi krainami, tak i za košt stvareńnia kalidoraŭ biaśpieki z dapamohaj pieramovaŭ ź cikavymi dla nas z turystyčnaha punktu hledžańnia dziaržavami», — skazaŭ kiraŭnik urada.
Jak padkreśliŭ Hacharyja, «hetyja pieramovy ŭžo pačatyja» i Hruzija budzie «adnoj ź pieršych krain, jakija adkryjuć svaje miežy i infrastrukturu dla taho, kab pryniać haściej z-za miažy». Jon adznačyŭ, što z 1 lipienia «paetapna pavinny adnavicca» avijaznosiny ź inšymi dziaržavami.
U Hruzii z-za pandemii z 21 sakavika pa 22 maja abvieščany režym nadzvyčajnaha stanovišča. Akramia taho, kožny dzień z 21:00 da 06:00 dziejničaje kamiendanckaja hadzina. Respublika z 18 sakavika ŭviała zabaronu na ŭjezd zamiežnikaŭ, a z 21 sakavika spyniła avijaznosiny z usimi dziaržavami.
Pavodle apošnich źviestak, u krainie vyjaŭlena 615 vypadkaŭ zaražeńnia karanavirusam. Jašče troje hramadzian Hruzii ź infiekcyjaj byli dastaŭleny na radzimu z-za miažy. 275 čałaviek papravilisia. Na karancinie znachodziacca kala 5 tysiač čałaviek, u stacyjanarach — 491, dzieviać pacyjentaŭ pamierli.
