U piatnicu niekatoryja škoły atrymali schiemu, jakaja tłumačyć, jak vystaŭlać za čverć i hod adznaki ŭ hetym navučalnym hodzie. U dakumiencie skazana: kali vučań nie chodzić na zaniatki pa zajavie baćkoŭ, to ŭ žurnale stavicca adznaka ab propusku. Za čaćviortuju čverć jon budzie nie atestavany, hadavaja adznaka vystaŭlajecca pa vynikach troch čverciaŭ, paviedamlaje Tut.by.
U schiemie atestacyi za čaćviortuju čverć jość dva hałoŭnyja punkty. Jak vystavić acenki tym, chto chodzić na zaniatki, i tym školnikam, jakija zastalisia doma.
Ź pieršymi ŭsio prosta: «Atestacyja vučnia ažyćciaŭlajecca z ulikam jaho navučalnych dasiahnieńniaŭ. Atestacyja za hod ažyćciaŭlajecca pa vynikach čatyroch čverciaŭ».
A jak ža buduć aceńvać tych, chto zastaŭsia doma? Kali školnik na indyvidualnym navučańni (naprykład, praz stan zdaroŭja), to škoła ci himnazija raspracoŭvaje dla jaho indyvidualny navučalny płan, u žurnale robicca zapis «vyvučaje samastojna». «Pa vynikach 4-j čverci navučeniec atestujecca, atestacyja za hod ažyćciaŭlajecca pa vynikach čatyroch čverciaŭ», — paznačana ŭ hetaj schiemie.
Tyja dzieci, jakija nie vyjšli paśla viasnovych kanikuł na zaniatki i zastalisia doma pa zajavie baćkoŭ, nie buduć atestavanyja za čaćviortuju čverć. Ustanova adukacyi davodzić da školnikaŭ navučalny płan, ale ŭ kłasnym žurnale stavicca adznaka «n».
«Atestacyja za hod ažyćciaŭlajecca pa vynikach troch čverciaŭ», — havorycca ŭ dakumiencie. Heta značyć składuć adznaki za try čverci i padzielać na try.
Adzin z nastaŭnikaŭ himnazii Mahiloŭskaj vobłaści raspaviadaje TUT.BY, što ŭ piatnicu padčas apieratyŭnaj narady była ahučana mienavita hetaja schiema. Choć napiaredadni vyrašałasia inšaje pytańnie: jak z himnazii naładzić suviaź ź dziećmi praz Zoom? Paśla hetaha rasparadžeńnia nieabchodnaść u takim dystancyjnym navučańni adpała, bo dzieci nie prysutničajuć na ŭrokach.
— Nam skazali, što pryjšoŭ list ź Ministerstva adukacyi i raspaviali ŭsio słova ŭ słova, jak u hetaj schiemie, — kaža nastaŭnik, jakomu my pakazali dakumient. — U baćkoŭ jość prava pakinuć dzicia pa zajavie na paŭtara miesiaca. Ciapier zvarotnuju suviaź ź dziećmi praz Zoom možna nie arhanizoŭvać: acenki pastavić im nielha, a z 23 krasavika tym, chto nie chodzić u škołu, pačali stavić «n». Toje, što dzicia nie atestavali za čaćviortuju čverć, nikudy ž nie idzie. U asabistaj spravie pakazvajucca tolki hadavyja adznaki.
Pa słovach nastaŭnika, ciapier u kłasie prysutničaje pa 6-8 čałaviek, u adnym kłasie na zaniatki prychodziać 15 dziaciej. Naš surazmoŭca adznačaje: nie tak šmat dziaciej, jakija znachodziacca na chatnim navučańni. Pieravieścisia na jaho dosyć składana, takoje rašeńnie moža pryniać miedyka-reabilitacyjnaja ekśpiertnaja kamisija.
— Na chatnim navučańni, naprykład, mohuć być dzieci ź invalidnaściu ci tyja, chto złamaŭ nahu i nie moža fizična prysutničać u škole. Da takich dziaciej nastaŭniki chodziać dadomu, zajmajucca i tak ich atestoŭvajuć, — dadaje nastaŭnik adnoj z himnazij Mahiloŭskaj vobłaści.
U Minadukacyi paćvierdzili infarmacyju ab tym, što dzieci ŭ čaćviortaj čverci ŭ tym liku buduć atestavanyja pa toj schiemie, jakuju pryviali vyšej.
— My biezbaluča vyjšli z hetaj situacyi. Usie dzieci buduć atestavanyja pa vynikach troch čverciaŭ albo pa vynikach čatyroch čverciaŭ, — prakamientavali ŭ Ministerstvie adukacyi.
Nahadajem, 28 krasavika ŭ pieradačy «U abstanoŭcy śvietu» na STV načalnik Hałoŭnaha ŭpraŭleńnia prafiesijnaj adukacyi Ministerstva adukacyi Siarhiej Kaśpiarovič zajaviŭ, što studenty i školniki pavinny asabista prysutničać na atestacyi.
— Kali dzieci nie chodziać na zaniatki, hetym samym praduchilajučy i dla siabie, i dla svaich blizkich mahčymaść kantaktavać, naprykład, ź ludźmi, jakija, dapuścim, majuć zachvorvańni navat u schavanaj formie, ale na atestacyju ŭsio-taki jany pavinny pryjści. A naša zadača, z ulikam rekamiendacyj Ministerstva achovy zdaroŭja, — zabiaśpiečyć maksimalna biaśpiečnyja ŭmovy, zabiaśpiečyć umovy, kali niama hetych masavych navałaŭ. I tut, znoŭ ža, rašeńni bačacca, — kazaŭ Kaśpiarovič.
