Žycharka Žłobina, prychodziačy ŭ dom da svajho chłopca, rehularna krała ŭpryhažeńni jaho maci, kab kuplać sabie modnyja rečy, paviedamlaje «Novy dzień».
23-hadovaja dziaŭčyna raniej užo była asudžanaja za kradziež majomaści z vykarystańniem kampjutarnaj techniki. Tady sud prysudziŭ jaje da adnaho hoda pazbaŭleńnia voli. Vyzvaliŭšysia ź miescaŭ pazbaŭleńnia voli, dziaŭčyna praciahły čas nidzie nie pracavała.
U kastryčniku 2019 hoda praź internet jana paznajomiłasia z mužčynam, jaki žyvie ŭ Žłobinie. Nieŭzabavie jany sustrelisia asabista. Potym novy znajomy pačaŭ časta zaprašać jaje da siabie dadomu. Jašče pry pieršym naviedvańni čužoj kvatery žančyna pabačyła dźvie škatułki — adnu ŭ spalni, druhuju — u haścinaj. Zastaŭšysia na niejki čas adna, hościa zazirnuła ŭ ich. Tam lažali załatyja ŭpryhažeńni i bižuteryja, jakija naležać maci znajomaha.
U pieršy raz dziaŭčyna vyniesła z saboj załatyja zavušnicy, potym łancužok i hetak dalej. Usiaho skrała bolš za dziesiać juvielirnych vyrabaŭ na ahulnuju sumu zvyš 6000 rubloŭ. Vykradzienaje jana zdavała ŭ łambard, a na vytarhavanyja hrošy kuplała sabie modnuju vopratku.
Haspadynia ŭpryhažeńniaŭ pačała zdahadvacca pra kradziažy ŭ domie tolki paśla taho, jak nie daličyłasia ŭ kašalku 300 rubloŭ. Apieratyŭniki vyličyli i zatrymali padazravanych.
Niadaŭna adbyŭsia sud. Jon pryznaŭ žycharku Žłobina vinavataj u kradziažy i prysudziŭ jaje da dvuch hadoŭ abmiežavańnia voli.
