Alaksandr Łukašenka siońnia razam z prezidentam Jehipta Abdel Fatacham as-Sisi znajomiacca z chodam budaŭnictva novaj administracyjnaj stalicy Jehipta, jakaja ŭzvodzicca ŭ 45 km na ŭschod ad Kaira, piša BiełTA.
Znajomstva biełaruskaha lidara z Novym Kairam, jak achryścili horad u narodzie, pačałosia z ranicy. Abdel Fatach as-Sisi sustreŭ Łukašenku kala kompleksu Al Masa Capital, na terytoryi jakoha znachodzicca najbujniejšy ŭ Afrycy kanhres-centr, 14 prezidenckich vił, 60 haściničnych apartamientaŭ i fiešenebielny hatel Al Masa Royal Palace.
Kancepcyja hetaha maštabnaha prajekta była pradstaŭlena niekalki hadoŭ tamu. Jehipieckija ŭłady raspracavali jaho, kab vyrašyć prablemu pieranasielenaści Kaira: pavodle prahnoznych acenak, nasielnictva horada da 2050 hoda moža dasiahnuć 40 młn. Zaraz u Kairy pražyvaje amal 10 młn čałaviek, u ahłamieracyi — bolš za 20 młn.
Jak raspaviali kiraŭniku biełaruskaj dziaržavy, prajekt realizujecca pa pryncypie «razumny horad budučyni». U novaj stalicy stvorać administracyjny i finansavy centry Jehipta. Tut raźmieściacca asnoŭnyja dziaržaŭnyja ŭstanovy, ambasady, pradstaŭnictvy mižnarodnych arhanizacyj i zamiežnych kampanij. U horadzie pabudujuć bolš za 20 žyłych rajonaŭ na 6,5 młn čałaviek, vialiki park i štučnyja aziory, kala 2 tysiač ustanoŭ adukacyi i bujny technapark, zvyš 600 balnic i miedcentraŭ, novy mižnarodny aeraport i chutkasnuju čyhunku da Kaira.
Spačatku prezidenty naviedajuć horad kultury i mastactvaŭ. Tut budujecca biblijateka, niekalki teatraŭ, vystavačnyja zały, muziei i halerei, a taksama kafe i restarany. Adkryćcio horada pavinna supaści ź pierajezdam u novuju administracyjnuju stalicu orhanaŭ dziaržaŭnaj ułady ŭ 2020-2021 hadach.
