U Redakcyju «Našaj Nivy» źviarnuŭsia Andrej Davydovič, syn asudžanaha za dziejańni seksualnaha charaktaru ź niepaŭnaletnimi Viačasłava Davydoviča. Jon choča, kab «Naša Niva» vydaliła z usich artykułaŭ adras doma, u jakim ździajśniaŭ złačynstvy jaho baćka. Matyvacyja takaja: maŭlaŭ, kali čałaviek uviadzie ŭ huhł adras «Mikałajeŭskaja, 9», u jaho składziecca niehatyŭnaje ŭražańnie pra haspadara doma.
Viačasłaŭ Davydovič vučyŭsia ŭ Akademii MUS, pracavaŭ milicyjantam, kadravym supracoŭnikam u Administracyi prezidenta. A potym zasnavaŭ mižnarodnuju dabračynnuju hramadskuju arhanizacyju «U dapamohu dzieciam-sirotam». Fota Siarhieja Hudzilina
Andrej Davydovič nazyvaje siabie ŭłaśnikam doma i narakaje, što zhadka adrasa na sajcie NN.by abmiažoŭvaje jaho pravy.
«Liču, što infarmacyja, jakaja ŭtrymlivaje adras doma, nosić asabisty charaktar i nie moža być raspaŭsiudžana biez majoj zhody», — tłumačyć jon.
Adnak nie ŭsio tak prosta.
Nahadajem, hihancki katedž u Zacani pad Minskam trapiŭ u centr hramadskaj uvahi jak miesca, kudy dla seksualnych zabaŭ zavablivali niepaŭnaletnich chłopčykaŭ.
Płošča katedža Davidoviča — bolš za 1700 kvadratnych mietraŭ. Jon adzin z samych vialikich u Biełarusi
Čytajcie. Navošta «surjoznyja dziadźki» zavablivali niepaŭnaletnich chłopčykaŭ u katedž u pasiołku Zacań?
Kali nad Davydovičam stali zhuščacca chmary, jon na ŭsialaki vypadak pierapisaŭ katedž na syna.
Sprava ŭ tym, što spačatku Davydoviča sudzili pa ekanamičnym artykule, za pradprymalnickuju dziejnaść biez rehistracyi z atrymańniem prybytku ŭ asabliva bujnym pamiery. Ź jaho spahnali amal 100 tysiač rubloŭ, ale katedž nie čapali, bo na toj momant jon farmalna nie byŭ va ŭłasnaści Davydoviča. Paśla byŭ jašče i «seksualny» artykuł, ale ŭ vyniku złačyniec adsiedzieŭ usiaho kala 4 hadoŭ.
Pryčym, jak vyśvietliła «Naša Niva», u žniŭni 2019 hoda syn viarnuŭ baćkaŭ «padarunak» nazad. Viačasłaŭ Davydovič znoŭ staŭ haspadarom taho samaha doma i zastajecca im dahetul.
Akazałasia, jaho syn schłusiŭ u liście ŭ «Našu Nivu» pra toje, što vałodaje katedžam. Admietna, što jon dasłaŭ u «Našu Nivu» pierapisku ź niekatorymi inšymi ŚMI. Jany vyrašyli vydalić adras doma Davydoviča sa svaich starych artykułaŭ.
