Ministr infarmacyi Aleś Karlukievič u ramkach Minskaj knižnaj vystavy adkazaŭ na niekalki pytańniaŭ «Našaj Nivy».
Aleś Karlukievič. Fota Nadziei Bužan.
«NN»: Vialikuju papularnaść siońnia nabirajuć telehram-kanały. Niama idei pryraŭniać ich u statusie da ŚMI?
Aleś Karlukievič: Pakul što nie płanujecca. Technałohii raźvivajucca vielmi chutka. Biezumoŭna, dziejnaść telehram-kanałaŭ — heta śfiera abmierkavańnia analitykaŭ i ekśpiertaŭ. Mahčyma, niejkija prapanovy ŭ hetym kirunku buduć vyłučanyja z boku parłamientaryjaŭ, siarod jakich dastatkova šmat ludziej z kahorty miedyjščykaŭ. Ja tolki adznaču, što i da pytańnia ŭpłyvu telehram-kanałaŭ na hramadstva my stavimsia vielmi surjozna.
«NN»: Nie raskažacie, što vy sami čytajecie ŭ telehramie?
AK: Vielmi šmat čytaju. Nie nazavu z adnoj prostaj pryčyny: kab nie stvarać rekłamu tamu ci inšamu miedyjnamu resursu.
«NN»: Važnaja tema, jakaja chvaluje šmat ludziej u rehijonach: źmianšeńnie biełaruskaj movy ŭ rajonkach. Ci možna z hetym niešta zrabić?
AK: Heta tema nie adnaho hoda. I ja sam nieadnarazova vykazvaŭsia na hety kont: my źviartajem uvahu na hety praces tych, chto prychodzić pracavać u rajonnyja haziety.
I chaču, moža być, vielmi idealistyčna skazać, ale vializnyja spadziavańni na moładź, na tych, chto ciapier vučycca na fakultecie žurnalistyki BDU i na jaje pryjarytety ŭ dačynieńni da biełaruskaj movy.
«NN»: Moža, varta niejak zaachvocić biełaruskamoŭnych aŭtaraŭ?
AK: Jak?
«NN»: Skažam, pavysić zarobak na 10%.
AK: Rekamiendacyi možna lohka vydać, ale rašeńnie za kankretnymi ludźmi na miescach, u tym ci inšym kalektyvie. Nie chaču rabić vielmi ahulnyja zakliki.
«NN»: Nie tak daŭno vy kazali, što ŭ ŚMI pavialičvajecca kolkaść fejkaŭ. A dzie vy ich bačycie najpierš — u rasijskich vydańniach, u biełaruskich?
AK: Takaja tendencyja vidavočnaja. Adkul iduć — treba hladzieć i padzialać na kirunki, temy, źjavy. Mnie zdajecca, što karektniej budzie havaryć pra kankretnyja fejki.