Biełaruskija NPZ hatovyja płacić rasijskim naftavym kampanijam premiju pamieram 5 dalaraŭ za tonu, adnak u bolšaści rasijskich NK apietyty bolšyja. Pra heta TUT.BY raspaviali infarmavanyja krynicy.
- Biełaruś hatovaja płacić premiju da ekspartnaj alternatyvy (cana suśvietnaha rynku minus ekspartnaja pošlina i košt transparciroŭki) pamieram 5 dalaraŭ. Ale bolšaść rasijskich kampanij chočuć premiju ŭ 18-20 dalaraŭ, - skazała krynica ŭ naftavaj śfiery. Aficyjna paćvierdzić hetuju infarmacyju nie ŭdałosia.
Pradstaŭnik adnoj z rasijskich naftavych kampanij zapeŭniŭ, što «šmat chto hatovy pracavać na ŭmovach minułaha hoda, kali nie ŭmiašajecca palityka».
Raniej pamier premii nazyvaŭsia ŭ rajonie 10 dalaraŭ za tonu. Takim čynam Minsk, nabyvajučy biaspošlinnuju naftu, sprabavaŭ stymulavać rasijskija kampanii.
- U Rasii źmianiŭsia pamier ekspartnaj pošliny, što ŭličvajecca pry raźliku ekspartnaj alternatyvy. Mienavita z-za źmieny raźlikaŭ i pajšli roznahałośsi pa pamiery premii, - tłumačyć surazmoŭca. - Ciapier jość mahčymaść pastaŭlać bolš nafty ŭ dalokaje zamiežža. Tamu ŭsie chočuć zarablać bolš. Adsiul i premija vyrasła.
Raniej paviedamlałasia, što ŭłady Biełarusi admovilisia płacić premiju rasijskim naftavym kampanijam, ale na takich umovach pahadziŭsia pracavać tolki Michaił Huceryjeŭ. jakoha nazyvajuć siabram Alaksandra Łukašenki. Adnak krynica, znajomaja z kantraktam kampanii hrupy «Safmar», skazała Tut.by, što rasijskamu biznesoŭcu «płaciać premiju».