Najbolšuju kolkaść hałasoŭ ad žury nabrali 20-hadovaja śpiavačka Lear (Valeryja Suravickaja) i 19-hadovaja Maryja Čaprasava. Valeryja padrychtavała dla konkursu pieśniu «Płanieta znasiła svaju arbitu» na vierš Vitala Ryžkova, napisany pa matyvach vierša hruzinskaha paeta Hahi Nachucryšvili.
Maryja ŭziała dla svajoj pieśni vierš «Horad viosak» Antona Rudaka.
Na treciaje miesca pretendavali niekalki vykanaŭcaŭ. U vyniku dyskusii, žury pryniała rašeńnie dapuścić u finalnuju stadyju nie troch vykanaŭcaŭ, jak mierkavałasia, a čatyroch. U ich lik trapiŭ hurt Pylai, jaki zasnavali 26-hadovyja muzyki Ryhor Łajkoŭ i Uładź Pylčanka. Jany pakłali na muzyku vierš «Mafija» na słovy Viktara Žybula.
Čaćviorty finalist «Zaśpiavaj-6» — hurt «Junosť» z Homiela, jaki zasnavali 22-hadovaja vakalistka Stefanija Chruščova, 23-hadovy vakalist i hitaryst Hieorhij Davydzian dy basist Ivan Tamiła (25 hod) . Jany ŭziali dla konkursnaj pieśni vierš «Viartajsia» Vitala Ryžkova. Cikava, što mienavita z pieśniaj na hety vierš u samym pieršym konkursie «Zaśpiavaj» pieramohu atrymaŭ Vital Varanko. Ciapier jon zahučaŭ u inšaj muzyčnaj stylistycy.
Sioleta zajavy na «Zaśpiavaj» padali 43 maładyja vykanaŭcy. Ź ich u nastupny tur prajšli 28 vykanaŭcaŭ. Usie jany atrymali prava paŭdzielničać u adukacyjnaj sesii, u miežach jakoj adbyłosia 14 sustrečaŭ z mientarami konkursu. Paśla jaje ŭdzielniki zrabili dema-varyjanty svaich konkursnych piesień pavodle vieršaŭ prapanavanych biełaruskich paetaŭ. Zatym adbyłosia žyvoje prasłuchoŭvańnie (usie 28 piesień u žyvym vykanańni možna pačuć tut). Pavodle dema-zapisaŭ i žyvych vystupaŭ žury nazvała finalistaŭ. Ciapier ich čakajuć indyvidualnyja zaniatki pa vakału (z Rusiaj), samaprezientacyi (z Nastaj Šastak), litaraturnaja kansultacyja (ad Andreja Chadanoviča) i saŭndpradusarskaja padtrymka (Barysa Kalendy i Paŭła Siniły).
Pa vyniku kožnaja z konkursnych piesień budzie prezientavana ŭ vyhladzie sinhłu ŭviesnu. Pieramožca konkursu budzie nazvany na kancercie finalistaŭ 6 sakavika ŭ kłubie Berlin (zapisacca možna tut). Jon atrymaje hrašovy pryz pamieram 1500 rubloŭ na realizacyju dalejšych tvorčych zadumaŭ.
Taksama budzie razyhrany dadatkovy pryz siarod astatnich udzielnikaŭ konkursu — sertyfikat na zapis pieśni ŭ studyi. Jaho ŭładalnik budzie abvieščany na kancercie finalistaŭ.
