Ukrainskaja palicyja zatrymała padazravanych u zabojstvie ŭ lipieni 2016 hoda ŭ Kijevie biełaruskaha žurnalista Paŭła Šaramieta. Pra heta ŭ Twitter paviedamiŭ ministr unutranych spraŭ Ukrainy Arsien Avakaŭ.
Pa słovach Avakava, tolki što Nacyjanalnaja palicyja zatrymała fihurantaŭ spravy ab zabojstvie Paŭła Šaramieta i abjaŭlaje im padazreńnie.
«Heta vynik vielmi składanaj pracy sapraŭdnych śpiecyjalistaŭ i važny krok da poŭnaha raskryćcia spravy», — dadaŭ jon.
Jon taksama adznačyŭ, što ŭ spravie ab zabojstvie Šaramieta iduć aktyŭnyja śledčyja dziejańni, sud nieŭzabavie abiare padazravanym miery strymańnia.
«Ale, uličvajučy hramadskaje značeńnie hetaj spravy, my praviadziom terminovy bryfinh, damo ŭsiu mahčymuju infarmacyju ab chodzie rasśledavańnia», — dadaŭ ministr.
Pa słovach deputata Uładzimira Arjeva, padazreńnie pradjaŭlajuć rok-muzykantu i vajennamu Andreju Antonienku. Jon taksama źjaŭlajecca aŭtaram himna Sił śpiecyjalnych apieracyj.
U Facebook Antonienka paćvierdziŭ, što padazreńnie ŭ zabojstvie Šaramieta pradjaŭlajuć jamu. Taksama jon paviedamiŭ, što pravaachoŭniki praviaduć u jaho pieratrus.
Akramia taho, paviedamlajecca pra zatrymańnie doktara i vałanciora Julii Kuźmienka pa padazreńni ŭ saŭdziele.
***
U pačatku listapada paviedamlałasia, što ŭ zabojstvie padazrajuć Uładzimira Hryščanku i jaho žonku Inu, siamiejnuju paru, što vykonvała zakaznyja zabojstvy. Maŭlaŭ, zatrymanaja tady para padobnaja da padazravanych, prykmiety jakich abviaščała śledstva.
Pavieł Šaramiet zahinuŭ 20 lipienia 2016 hoda, padarvaŭšysia ŭ aŭtamabili ŭ centry Kijeva, dzie jon žyŭ i pracavaŭ apošnija piać hadoŭ. U mašynie, na jakoj jechaŭ žurnalist, spracavała vybuchovaje prystasavańnie.
