Zapis i mantaž adbyvalisia na studyjach «Radyjo Svaboda» i «Jeŭraradyjo»: knihi Uładzimira Arłova, Adama Hłobusa i Vincesia Mudrova ahučyŭ Źmicier Bartosik, pieršuju častku knihi Alhierda Bachareviča zapisaŭ i ahučyŭ Siarhiej Šupa, nad ramanam Anki Upały pracavała Palina Dabravolskaja, a častku ramana Paŭła Sieviarynca ahučyŭ Pavieł Klok. Kaardynatarka prajekta — Darja Bialkievič.
Taćciana Niadbaj, staršynia Biełaruskaha PEN-centra raspaviadaje pra prajekt: «Spačatku my mierkavali, što zmožam ahučyć tolki adnu knihu, ale dziakujučy dapamozie partnioraŭ (Radyjo Svaboda i Jeŭraradyjo) atrymałasia «achapić» usich šortlistaraŭ minułaha hodu. Heta piłotny prajekt, spadziajusia, jon budzie praciahvacca. My b chacieli, kab takim čynam sučasnaja biełaruskaja litaratura stała dastupnaja dla ludziej ź invalidnaściu pa zroku, dla tych, chto vučyć movu, a taksama i dla šyrokaj aŭdytoryi, jakaja lubić bolš słuchać, čym čytać».
Aktor ahučki Pavieł Klok dzielicca svaimi ŭražańniami:
«Ahučvać knihi z šort-lista premii, chaj i častkova, — biezumoŭna, cikavy sposab pryciahnuć da ich uvahu. Kniha, ź jakoj daviałosia pracavać mnie, mieła peŭnyja asablivaści, što adnačasova i ŭskładniała zadaču, i rabiła jaje bolš cikavaj, i vymušała emacyjna pryviazvacca da knihi. Kryšačku, na paŭknižački, nyrnuć u taki tekst biez mahčymaści prosta «prabiehčy vačyma» — adnaznačna cikavy dośvied».
Knihi možna pasłuchać (ci spampavać) pa nastupnych spasyłkach:
Uładzimir Arłoŭ «Tancy nad horadam»
Alhierd Bacharevič «Sabaki Eŭropy» (častka «My lohkija, jak papiera»)
Vinceś Mudroŭ «Zabojca anioła»
Adam Hłobus «Siamja» (raman «Dom»)
Pavieł Sieviaryniec «Biełarusalim» (častka «Noč naradžeńnia»)
Anka Upała «Na zaśniežany vostraŭ»
Uračystaja cyrymonija ŭznaharodžańnia sioletnich łaŭreataŭ premii Hiedrojca adbudziecca 25 vieraśnia ŭ prastory ZAL#2, što ŭ mienskim Pałacy mastactvaŭ. Pačatak cyrymonii — a 19:00.
Premija imia Ježy Hiedrojca zasnavanaja Biełaruskim PEN-Centram, Sajuzam biełaruskich piśmieńnikaŭ i Polskim Instytutam u Miensku i ŭručajecca za najlepšuju knihu ŭ žanry mastackaj i dakumientalnaj prozy. Uznaharoda maje status hałoŭnaj niezaležnaj litaraturnaj premii Biełarusi.
Papiarednija pieramožcy:
- Pavał Kaściukievič, «Zbornaja RB pa niehałoŭnych vidach sportu» (2012)
- Uładzimir Niaklajeŭ, «Aŭtamat z haziroŭkaj ź siropam i biez» (2013)
- Ihar Babkoŭ, «Chvilinka: Try historyi» (2014)
- Viktar Kaźko, «Čas źbirać kości» (2015)
- Maks Ščur, «Zaviaršyć hieštalt» (2016)
- Źmicier Bartosik, «Byŭ u pana vierabiejka havaruščy» (2017)
- Uładzimir Arłoŭ, «Tancy nad horadam» (2018).
