Hramadzianinu Ŭkrainy Alaksandru Č. (proźvišča viadoma) pahražaje ad 12 da 15 hadoŭ źniavoleńnia. Pavodle rašeńnia Vałynskaha apelacyjnaha suda, abvinavaŭčy akt budzie razhladać Łucki haradzki i rajonny sud Vałynskaj vobłaści.
«Pracedura aŭtamatyčnaha raźmierkavańnia vyznačyć skład kalehii sudździaŭ, jakija buduć razhladać hetuju spravu. Paśla hetaha sudździ pryznačać datu razhladu spravy pa sutnaści», — paviedamili Svabodzie ŭ Vałynskim apelacjnym sudzie.
Śledztva abvinavaciła ŭkrainca ŭ dziaržaŭnaj zdradzie, jakaja była ŭčyniena naŭmysna na škodu dziaržaŭnaj i infarmacyjnaj biaśpiecy Ŭkrainy: špijanaž i dapamoha pradstaŭnikam zamiežnaj dziaržavy ŭ praviadzieńni dyversijnaj dziejnaści suprać Ukrainy.
Jak vynikaje z materyjałaŭ kryminalnaj spravy, Alaksandar Č. u kancy leta 2004 hodu daŭ vusnuju i piśmovuju zhodu načalniku adździełu vyviedki Pinskaha pamiežnaha atradu «Rečyca» ab kanfidencyjnym supracoŭnictvie. Pavodle damovy, jon musiŭ pieradavać biełaruskamu boku infarmacyju ab systemie biaśpieki dziaržaŭnaj miažy i asabistym składzie padraździaleńniaŭ na pamiežnych učastkach u Ratnaŭskim i Dubrovickim rajonach Vałynskaj vobłaści. Pieradača infarmacyi, pavodle śledztva, ažyćciaŭlałasia pry dapamozie sotavaj suviazi (u spravie zaznačajecca dakładny numar mabilnaha telefonu).
Takim čynam, pavodle śledztva, Alaksandar Č. «ustupiŭ u ahienturnyja adnosiny z zamiežnaj specsłužbaj i, adpaviedna, stvaryŭ umovy dla zamiežnych specsłužbaŭ dla ažyćciaŭleńnia vyviedvalnaj dziejnaści na terytoryi Ŭkrainy».
U abvinavaŭčym akcie adznačajecca, što ŭkrainiec praciahvaŭ supracu da svajho zvarotu ŭ SBU, u jakim i paviedamiŭ ab verbavańni.
Advakat abvinavačanaha Ŭładzimir Ramanoŭski admoviŭsia ŭdakładniać detali spravy i prafesijnuju prynaležnaść svajho klijenta: «Ja nie mahu kamentavać abstaviny hetaj spravy».
Sioleta ŭ žniŭni stała viadoma, što hramadzianin Ukrainy dobraachvotna źviarnuŭsia ŭ Słužbu biaśpieki i nazvaŭ imia svajho verbavalnika ŭ Biełarusi. Im nibyta byŭ supracoŭnik Upraŭleńnia finansavych raśśledavańniaŭ Kamitetu dziaržaŭnaha kantrolu Bieraściejskaj vobłaści Ŭładzisłaŭ Ł. Hety vypadak adbyŭsia taksama na Vałyni.
Heta piaty vypadak nibyta verbavańnia ŭkraincaŭ biełaruskimi specsłužbami i pieršy, kali abvinavačańnie patrabuje pakarańnia. Dahetul usich ukraincaŭ, jakija dobraachvotna paviedamlali ab svaim verbavańni, vyzvalali ad kryminalnaj adkaznaści.
Paśla pieršych analahičnych historyj u presavym centry Słužby biaśpieki Ŭkrainy Svabodzie zajaŭlali, što takija fakty fiksujucca «amal systematyčna». Što praŭda, pra ich nikoli nie paviedamlajuć aficyjna — usie jany stali viadomyja paśla publikacyi sudovych rašeńniaŭ ab zakryćci kryminalnych spraŭ suprać ukraincaŭ, jakija dobraachvotna paviedamili SBU pra svajo verbavańnie.
