Ministr zamiežnych spraŭ Uładzimir Makiej prakamientavaŭ vizit pamočnika prezidenta Złučanych Štataŭ Amieryki pa nacyjanalnaj biaśpiecy Džona Bołtana ŭ Minsk. Tekst zajavy źmieščany na staroncy MZS u fejsbuku.
«Nie treba šukać nijakaj kanśpirałahičnaj zmovy za faktam vizitu, — padkreśliŭ U. Makiej. — Nakolki ja razumieju, [Bołtan] zapłanavaŭ hety tur u niekalki krain, u tym liku ŭ Biełaruś, kab paznajomicca ź situacyjaj u rehijonie… My bačym, što jość šerah kanfliktaŭ, jość peŭnyja pytańni, źviazanyja z prablemaj teraryzmu i biaśpiekaj u našym rehijonie i ŭ cełym śviecie».
«Tamu, kali da nas pastupiŭ zapyt na praviadzieńnie hetaha vizitu, to my, zychodziačy z taho, što starajemsia vybudoŭvać narmalnyja adnosiny z ZŠA, jakija na siońnia, treba pryznać, abjektyŭna źjaŭlajucca viadučaj dziaržavaj u śviecie, biezumoŭna, dali zhodu… Pavinien skazać, što vizit byŭ vielmi i vielmi karysnym», — zaznačyŭ ministr.
U.Makiej źviarnuŭ uvahu, što «nichto nikoha nie zaklikaŭ dałučycca da čaho-niebudź ci adyści ad kaho-niebudź ci ad čahości. Byli ščyryja dyskusii nakont situacyi ŭ našym rehijonie, situacyi ŭ śviecie, dyskusii pa pytańniach biaśpieki, pa pytańniach suśvietnaha handlova-ekanamičnaha supracoŭnictva, pa pytańniach raźvićcia dvuchbakovych adnosinaŭ pamiž Biełaruśsiu i Złučanymi Štatami Amieryki. Absalutna ščyraja razmova, vielmi zacikaŭlenaja».
Pa słovach ministra, abmiarkoŭvalisia pytańni rehijanalnaj biaśpieki, u pieršuju čarhu, situacyja va Ukrainie.
«Kiraŭnik biełaruskaj dziaržavy vykazaŭ viadomy punkt hledžańnia na situacyju va Ukrainie i našy prapanovy adnosna taho, jak možna było b pieraadoleć hety kanflikt. Biełaruski bok ličyć, što pavinna być, viadoma ž, ščyraja zacikaŭlenaść ŭsich uciahnutych u hetuju spravu bakoŭ», — dadaŭ U. Makiej.
Ministr zaznačyŭ, što abmiarkoŭvalisia i inšyja pytańni, źviazanyja z rehijanalnaj biaśpiekaj, i nie tolki ŭ našym rehijonie, ale i pierśpiektyvy raźvićcia stanovišča na Blizkim Uschodzie i ŭ inšych častkach płaniety.
«Tut prezident Biełarusi dakładna skazaŭ pra toje, što ŭ biełarusaŭ hienietyčna zakładziena nieprymańnie vyrašeńnia lubych pytańniaŭ z dapamohaj kanfliktu, tym bolš z dapamohaj zbrojnaha kanfliktu, z dapamohaj vojnaŭ i hetak dalej. Naša kraina pa sabie viedaje, što takoje vojny, jakija prachodzili pa terytoryi Biełarusi niekalki razoŭ u minułym stahodździ», — adznačyŭ U. Makiej.
Byli zakranuty taksama i pytańni handlova-ekanamičnaha supracoŭnictva ŭ suśvietnym maštabie.
«Tut taksama naša pazicyja adnaznačnaja, — źviarnuŭ uvahu Makiej. — My ličym, što treba šukać kampramisy. Treba nie ŭciahvacca ŭ handlovyja vojny, a sprabavać damovicca adzin z adnym i znachodzić kampramisnyja rašeńni lubych prablemnych pytańniaŭ, bo lubaja, miakka kažučy, zvada abo bojka pamiž asabliva bujnymi hieapalityčnymi hulcami adrazu ž ŭpłyvaje na ŭsiu ekanamičnuju situacyju, na handlova-ekanamičnaje supracoŭnictva i tym bolš heta tyčycca nievialikich krain, da jakich adnosicca i Biełaruś»
«Tamu my vielmi zacikaŭleny ŭ tym, kab padobnaha rodu handlova-ekanamičnyja sprečki vyrašalisia za stałom pieramovaŭ, spakojnym i mirnym šlacham, a nie šlacham vystaŭleńnia roznych ultymatumaŭ. I, znoŭ-taki, prezident Biełarusi dakładna i adnaznačna vykazaŭsia na hety kont», — dadaŭ kiraŭnik biełaruskaha zamiežnapalityčnaha viedamstva.
«Što tyčycca dvuchbakovych adnosinaŭ, to jany taksama byli abmierkavany dosyć pradmietna i kankretna, u tym liku i, jak było skazana našym prezidentam, byli zakranuty i niazručnyja pytańni, pytańni, jakija vyklikajuć peŭnuju zakłapočanaść u našych amierykanskich partnioraŭ. My damovilisia, što treba praciahvać dyjaloh, nie sychodzić ad vostrych tem, a sprabavać znajści vyrašeńnie tych pytańniaŭ, jakija lažać na pavierchni».
«Prezident Biełarusi dakładna skazaŭ, što my nie idziem da Złučanych Štataŭ z praciahnutaj rukoj, i my nie prosim čahości dać nam i pakłaści na stoł, abo niejkuju krošku zakinuć u rot. Nie. My chočam prosta raŭnapraŭnaha handlova-ekanamičnaha, palityčnaha, humanitarnaha i inšaha supracoŭnictva i ŭzajemadziejańnia. I my hatovyja da hetaha», — padreśliŭ U. Makiej
«Tak, hety praces nie prosty z ulikam taho, što peŭnyja abmiežavańni pakul jašče isnujuć u našych adnosinach. Ale samaje hałoŭnaje, i Džon Bołtan adnaznačna padkreśliŭ heta, samaje hałoŭnaje — jość razumieńnie taho, što treba praciahvać dyjałoh, treba sprabavać znachodzić raźviazki ŭsich pytańniaŭ, jakija pakul jašče zastajucca ŭ našym dvuchbakovym paradku dnia.
Tamu ja dumaju, što, choć heta byŭ i pieršy vizit (jaho ŭžo achryścili histaryčnym vizitam) - ale jon byŭ važny ŭ tym płanie, što baki pasprabavali bližej zrazumieć adzin adnaho. I ja dumaju, što samy hałoŭny vynik hetaha vizitu - heta toje, što baki pastaralisia pačuć adzin adnaho i damovilisia ab tym, što taki dyjałoh pavinien być praciahnuty i ŭ pierśpiektyvie», — reziumavaŭ ministr.
