Dvoje z paciarpiełych pry vybuchu na palihonie ŭ Archanhielskaj vobłaści pamierli nie ad traŭmaŭ i apiokaŭ, a ad pramianiovaj chvaroby, paviedamlaje niamiecki časopis Der Spiegel sa spasyłkaj na adnaho z archanhielskich daktaroŭ, jaki daŭ kamientar na ŭmovach ananimnaści.
Fota Sergey Yakovlev, Shutterstock.com
Lekar raspaviadaje, što paciarpiełych pry vybuchu dastavili ŭ balnicu ŭ pałovie na piatuju viečara avijacyjnaj ratavalnaj słužbaj. Troje mužčyn va ŭzroście kala 30 hadoŭ byli hołymi i pakrytyja folhaj, ich adzieńnie lažała ŭ polietylenavych pakietach. U adnaho ź ich byŭ pierałom chrybietnika, u inšaha, mahčyma, pierałom taza, traŭmy nie pahražali žyćciu. Lekary rychtavali pacyjentaŭ da apieracyi.
Paviedamlajecca, što pierad apieracyjaj u apieracyjnuju pryjšli dazimietrysty. Adna ź ich adrazu vybiehła, kali ŭbačyła ličby. Kala hałavy adnaho z pacyjentaŭ było zafiksavana beta-vypramieńvańnie 25 tysiač mikrarenthien u hadzinu. Pacyjentaŭ pavieźli z apieracyjnaj zały nazad u pryjomny pakoj i pa čarzie myli ich u vannaj. Vanna potym była nastolki zaražanaja, što paźniej vajskoŭcy jaje naohuł demantavali.
Paśla apieracyi pacyjentaŭ źbiralisia adpravić u Maskvu, adnak dvoje ź ich pamierli jašče pa darozie ŭ aeraport — nie ad traŭmaŭ, a ad nastupstvaŭ apramianieńnia.
