Śpiecyjalna da novaha navučalnaha hoda vydaviectva «Knihazbor» padrychtavała knihu «Kraina Vymiarenija», aŭtar — Aleh Hrušecki. Dla biełaruskaha knižnaha rynka kniha ŭ niečym unikalnaja. Praz kazačnyja historyi dzietki majuć mahčymaść daviedacca pra sposaby i adzinki vymiareńnia (daŭžynia, šyrynia, vyšynia), vahi i abjomu (kiłahramy, litry), adzinki vymiareńnia času (hadziny, chviliny), a dziakujučy biełaruskim prymaŭkam i prykazkam spaznajuć, čym adroźnivajucca miesiacy i pory hoda.
I ŭsie hetyja viedy padadzieny nie ŭ suchoj navučalnaj formie, a praz kazačnyja apaviadańni, dzie hałoŭnyja hieroi — nasielniki kazačnaha lesu (miadźviedź, vožyk, zajka, liska, łoś, vaviorki i inš.). Kožnaje apaviadańnie skančajecca płyŭnym pierachodam u nastupnuju temu, utvarajučy takim čynam adzinaje arhaničnaje cełaje, dzie ŭsie historyi pamiž saboju łahična złučany.
Kniha vialikafarmatnaja, u ćviordaj vokładcy, nadrukavanaja na krejdavanaj papiery. Raźličana dla dziaciej daškolnaha i małodšaha školnaha ŭzrostu. Nabyć knihu možna ŭ kniharniach Minska — «Akademkniha», «Centralnaja», «Viedy», «Śvietač», «Kniharnia piśmieńnika», u kramie «Moj modny kut» (u HC «Maskoŭska-Vienski», pav. 333), a taksama z rassyłańniem pa Biełarusi i śviecie praź Internet-kniharniu Knihi.by.
Pra aŭtaraŭ:
Aŭtar knihi — Aleh Hrušecki. Baćka traich dziaciej — dvuch synoŭ i dački. Dačka — vychavanka biełaruskamoŭnaha sadka, sioleta idzie ŭ pieršy kłas. Z bolšaha, dziakujučy dačce i dziela jaje, aŭtar i napisaŭ knižku, bo padobnaj litaratury na biełaruskaj movie nie staje. Aleh Hrušecki — žurnalist, litaratar, publicyst. Piša vieršy i kazki na biełaruskaj movie. Pracoŭnuju dziejnaść pačynaŭ sa starejšaha zavadatara ŭ škole, kiravaŭ dziećmi-skaŭtami, drukavaŭsia ŭ «Nastaŭnickaj haziecie», łaŭreat šerahu tvorčych premij. Žonka — piedahoh, pracavała vychavalnicaj u biełaruskamoŭnym sadku.
Mastak knihi — talenavity mastak Viktar Kozieł, vykładčyk pa malavańniu ŭ Krupickaj škole mastactvaŭ. Taksama šmatdzietny baćka — maje traich vydatnych łapačak-dočak.
