Biełteleradyjokampanija pakazała ŭ viečarovym efiry siužet, pryśviečany Siarhieju Sacuku, redaktaru sajta «Ježiednievnik» (Ej.by).
Jak śćviardžaje BT, u studzieni 2019 hoda Sacuk atrymaŭ hrošy ad biznesmiena Viktara Miadźviedskaha, pradstaŭlenaha ciapier jak «udzielnik pracesu za ŭchileńnie ad vypłaty sum padatkaŭ, zboraŭ». Jon padazravany pa kryminalnaj spravie.
Miadźviedski pieradaŭ Sacuku infarmacyju pra zakupki pa zavyšanych cenach i — jak jon sam śćviardžaje — prapanavaŭ $3000.
«Na sustrečy ja pieradaŭ Sacuku ŭsiu infarmacyju pa «Makafarma», jaho heta zacikaviła, i ja jamu prapanavaŭ hrošy ŭ kancy sustrečy — u sumie $3000, jakija ja jamu pieradaŭ», — kaža ŭ siužecie Viktar Miadźviedski.
Paśla ŭ siužecie zhadvajecca ahulnaja suma $5000, ale tłumačeńniaŭ, pa čyjoj inicyjatyvie jana była pieradadzienaja, niama.
Situacyja ź imaviernaj pieradačaj hrošaj adbyłasia ŭ studzieni 2019 hoda. U takim vypadku Sacuk budzie pavinien u pačatku 2020 hoda zadekłaravać atrymanyja hrošy i spłacić padatki.
U siužecie nie śćviardžajecca, što pieradadzienyja hrošy niejkim čynam paspryjali tamu, što była raspaŭsiudžanaja niepraŭdzivaja infarmacyja.
Naprykancy siužeta karespandent BT zrabiŭ «padkazku» pravaachoŭnikam: «Rasśledavańnie kryminalnaj spravy praciahvajecca, jak i praciahvajecca praca Siarhieja Sacuka ŭ žanry rasśledavańniaŭ. Mahčyma, darečy padumać i ab kryminalna-pracesualnym baku, ale heta ŭžo kampietencyja inšych orhanaŭ». Adnak nie ŭdakładniajecca, što mienavita prapanujecca inkryminavać redaktaru.
Sacuk pisaŭ šmat rasśledavańniaŭ pra situacyju ŭ biełaruskaj miedycynie. Heta jon letaś raskruciŭ temu karejskaj pryščepki «Eŭpienta», ad jakoj u Hancavickim rajonie raptoŭna pamierła dzicia. Sacuk kazaŭ, što čynoŭniki byli zacikaŭlenyja ŭ pastaŭkach «Eŭpienta» ŭ Biełaruś. Pa jahonaj viersii, na biełaruskich dzieciach stavilisia ekśpierymienty, kali im davali hetu pryščepku, jakaja nie prajšła rehistracyju ŭ Biełarusi.
Čynoŭniki abvierhli jaho zdahadki, suprać Sacuka vystupili dziaržaŭnyja ŚMI. Užo tady jany namiakali, što jaho rasśledavańni mohuć być zamoŭlenyja hulcami farmaceŭtyčnaha rynku. Ale historyja skončyłasia ničym.
Sacuk viadomy svaimi nieadnaznačnymi vykazvańniami. U pryvatnaści, jon zajaŭlaŭ, što ŭ śmierci Uładzisłava Kavalova (sprava ab terakcie ŭ minskim mietro) vinavatyja pravaabaroncy. Na jaho Ej.by vioŭ kałonku skandalny biznesmien Arkadź Izrailevič. Sacuk pahadžaŭsia ź jaho vykazvańniem, što abaroncy Kurapataŭ ihrajuć na habrejskim pytańni.
Sam Siarhiej Sacuk pakul niedastupny dla kamientara.
