Siastra Viktara Paŭłava, Raisa. Fota: spring96.org.
Naprykancy lipienia ŭ Viciebsku byŭ vyniesy čarhovy śmiarotny prysud. U hety raz da vyšejšaj miery pakarańnia prysudzili Viktara Paŭłava, jakoha abvinavacili ŭ zabojstvie dźviuch piensijanierak na Viciebščynie.
Rasstralajuć mužčynu, jaki pad Novy hod zabiŭ palenam dźviuch babulek
Siastra Paŭłava Raisa, raspaviała pravaabaroncam «Viasny», što źbirajecca zmahacca za žyćcio Viktara. U aŭtorak, 6 žniŭnia, jana naviedała brata ŭ Viciebskim śledčym izalatary, dzie ŭ kamiery jaho ŭtrymlivajuć adnaho. Heta było ich pieršaje spatkańnie paśla suda.
«Nam dali dźvie hadziny. Jon byŭ u kaściumie aranžavaha koleru. Padčas spatkańnia Vicia byŭ prykuty kajdankami da stała. Uvieś čas kala nas stajaŭ achoŭnik. Paŭsiul visieli videakamiery, tamu my nie mahli razmaŭlać absalutna na ŭsie temy», — raspaviadaje pra abstaviny spatkańnia siastra asudžanaha.
Jana spadziavałasia da apošniaha, što prysud budzie inšy. Pa słovach Raisy, jana navat nie viedała, što ŭ Biełarusi dahetul sudy vynosiać śmiarotnyja prysudy:
«Da hetaha vypadku ja navat nie viedała, što ŭ Biełarusi isnuje śmiarotnaje pakarańnie. Nie mahła padumać, što ŭ nas u krainie vykarystoŭvajuć rasstreł u jakaści pakarańnia. Sudździa tak pry vyniasieńni prysudu heta i skazaŭ…»
Siastra Paŭłava źviarnułasia da pravaabaroncaŭ pa dapamohu:
«Prysud niespraviadlivy. Dumaju, što jon nie adzin heta ŭsio rabiŭ. Jon nie moh adzin tak prybrać dom, schavać usio tak, kab praktyčna śladoŭ nijakich nie zastałosia.
Dumaju, što jon prosta baicca. Baicca achovy i naohuł kožnaha kroku. Jaho tam zaciukali. Jon, jak kažuć, užo nichto. Pryjšoŭ — začynili. Jon tak stamiŭsia, što zhodny ŭžo z usim i na ŭsio».
Jak adznačyŭ kaardynatar kampanii «Pravaabaroncy suprać śmiarotnaha pakarańnia ŭ Biełarusi» Andrej Pałuda,
takija kiejsy demanstrujuć, što mety kryminalnaj adkaznaści ŭ našaj krainie nie dasiahajucca. Tak i ŭ hetaj situacyi, vykreślivajučy Paŭłava z hramadstva śmiarotnym prysudam, dziaržava nie zadajecca pytańniem, čamu čałaviek, jaki ŭžo adbyŭ termin u miescach pazbaŭleńnia voli, znoŭ ździejśniŭ złačynstva, i nijakaha vypraŭleńnia asudžanaha nie adbyłosia.
Siastra Paŭłava paviedamiła pravaabaroncam, što Viktar užo dasłaŭ skarhu ŭ Viarchoŭny sud. Raisa spadziajecca, što vyniesieny śmiarotny prysud u dačynieńni da jaje brata budzie pierahledžany.
Heta ŭžo druhi śmiarotny prysud vyniesieny sioleta ŭ Biełarusi. 9 studzienia sudździ Mahiloŭskaha abłasnoha suda asudzili da rasstreła žychara Babrujska Alaksandra Asipoviča. Jaho abvinavacili ŭ dvajnym zabojstvie, ździejśnienym pry abciažarvajučych abstavinach.
