Najlepšyja šmatsieryjnyja stužki, jakija možna ŭbačyć u apošnim miesiacy. U našym śpisie buduć jak premjery, hetak i sieryjały, jakija viartajucca ŭ efir paśla pierapynku.
«Palaŭničy na rozum» (Mindhunter)
Psichałahičny tryler, drama. ZŠA, 2-i siezon
Ujavicie, jašče ŭ pačatku 1970-ch u navat nie dumali vyvučać psichałohiju i pavodziny złačyncaŭ. Ličyłasia, što hetaje mazhapraŭstva ni da čaho dobraha nie pryviadzie i heta budzie pustym marnavańniem času. Nie isnavała termina «sieryjny zabojca».
Maładoha ahienta FBR Chołdena Forda (u jaho jość realny pravobraz) pieršaha pačynaje cikavić pytańnie, čamu čałaviek idzie na zabojstvy, na zhvałtavańni, što hetamu spryjała ŭ dziacinstvie, u adnosinach z baćkami.
Z hetaha i pačynajucca padarožžy pa ŭsioj krainie z metaj razmovaŭ z samymi viadomymi złačyncami taho času. Vas absalutna šakujuć padrabiaznyja apoviedy. Adny mańjaki padajucca intelihientnymi i spakojnymi, inšyja — ahresiŭnymi i małaadukavanymi. Ale va ŭsich ich jość niešta takoje, što ich abjadnoŭvaje. I Chołden choča dakapacca da hetaha.
«Prapaviednik» (Preacher)
Čorny humar, drama. ZŠA, 4-y siezon
Džesi Kaster — heta nie samy typovy amierykanski pastar. U jaho daŭni kryzis viery, prapaviednika nie pakidajuć sumnievy, ci jość Boh. Niadzielnyja pramovy Kastera ciažka nazvać natchnialnymi. Prapaviedniku bolš padabajecca žłukcić viski i burbon, a taksama kuryć cyhary. Džesi niečakana pačynaje siabroŭstva z sapraŭdnym vampiram.
I hetki dekadans praciahvajecca da toj pary, pakul u jaho nie ŭsialajecca płod kachańnia anioła i demana, tak zvany Hieniezis. U adzin ź dzion prapaviednik abiacaje pryvieści ŭ carkvu sapraŭdnaha Boha…
«Blask» (GLOW)
Kamiedyjnaja drama. ZŠA, 3-i siezon
Chočacie kino pra mocnych žančyn? Tady vam siudy. Pryčym mocnyja jany, viadoma, nie tolki fizična, ale svaim charaktaram, losam. U «Blasku» vy pabačycie samych strakatych piersanažaŭ.
U centry — apovied aktrysy-niaŭdačnicy, jakaja nijak nie moža atrymać značnuju rolu ŭ kino, zatoje jana atrymlivaje zaprašeńnie vystupać u žanočym reślinhu. Kali chto nie viedaje, to heta takaja amierykanskaja zabaŭka, dzie złučajucca sport i šou.
Čym jašče admietny film? Kaniečnie, atmaśfieraj Amieryki 1980-ch. Udała padabranyja dekaracyi, kaściumy. Mabyć, u ZŠA hety film staŭ papularny i praz čyjuści nastalhiju pa maładości.
«Taja, jakaja stanovicca Boham u Centralnaj Fłarydzie» (On Becoming a God in Central Florida)
Kamiedyja. ZŠA, 1-y siezon
Pamiatajecie finansavyja piramidy pačatku 90-ch? Usialakija MMM i inšyja kantory. U Amierycy taksama było niešta padobnaje.
Krystał Džył pracuje ŭ akvaparku za minimalnuju apłatu, u jaje pamior muž, zdajecca, žyćcio lacić pad adchon i ŭžo ničoha nie zdolna ŭratavać situacyju. Tym nie mienš Krystał vieryć u svaju «amierykanskuju maru». Časam šlacham padmanu i šantažu jana ŭpeŭniena kročyć da viaršyni hetaj piramidy.
«Čamu žančyny zabivajuć» (Why Women Kill)
Kamiedyjnaja drama. ZŠA, 1-y siezon
Try historyi, jakija adbyvajucca ŭ adnym i tym ža domie, ale ŭ rozny čas: 1960-ja, 1980-ja i 2019 hod. Abjadnoŭvaje ich toje, što žančyny — chatniaja haspadynia, śvieckaja lvica i juryst —sutykajucca sa zdradaj z boku muža.
«Niaviernaść usio jašče zdolnaja nas urazić da hłybini dušy», — kaža Mark Čery (stvaralnik hetaha sieryjała i «Adčajnych chatnich haspadyń»). U hetym sieryjale taksama možna prasačyć evalucyju staŭleńnia hramadstva da instytutu siamji.
