U rasijskim Sankt-Pieciarburhu zahinuŭ 40-hadovy błohier Pavieł Š. z Oršy, aŭtar videakanała Road to film.
Jak paviedamlaje telehram-kanał Mash, jon zdymaŭ čarhovy rolik na nabiarežnaj raki Karpaŭki. Razam ź dźviuma kamierami i dyhieram Alaksiejem K. jon spuskaŭsia ŭ kanalizacyjny kalektar hłybinioj kala 5 mietraŭ.
U 4 ranicy jany pierastali vychodzić na suviaź, i ich siabry vyklikali ratavalnikaŭ.
I Paŭła, i Alaksieja znajšli na dnie kalektara. Pavodle papiaredniaj viersii, błohier upaŭ z vyšyni. Dyhieru, vidać, nie chapiła kisłarodu.
Jutub-kanał Road to film mieŭ 580 tysiač padpisantaŭ. U svoj čas Pavieł staŭ druhim biełarusam, jaki zajmieŭ status «srebnaja knopka Jutuba».
Samaje papularnaje videa Paŭła, pra padziemnuju Maskvu, sabrała 4,5 miljona prahladaŭ.
