«Naša Niva» paviedamlała pra historyju, jakaja adbyłasia z 26-hadovym Michaiłam Ryštoŭskim.
Čytajcie: 26-hadovy sałdat z Hrodzienščyny pamior ad raku, jaki raźviŭsia ŭ armii. Vyjavili jaho tolki na čaćviortaj stadyi. Chto vinavaty?
Jon pamior doma ad raku straŭnika 20 lipienia, pierad tym jon da maja słužyŭ u vojsku. Jaho kamisavali, tolki kali chvaroba była ŭžo na fatalnaj stadyi. Najchutčej, chłopca ŭziali ŭ armiju ŭžo z rakam. I z ankałohijaj jon słužyŭ — nichto nie zvažaŭ na boli i vanitavańnie, chłopca pičkali prymityŭnymi tabletkami. Jak takoje mahło zdarycca?
Siamja śćviardžaje, što Karelicki vajenkamat śpiecyjalna, praź niedabory, zapluščyŭ vočy na kiepskija analizy pryzyŭnika i adpraviŭ jaho słužyć. U armii Miša bolšuju častku času pravioŭ ŭ špitalach na prymityŭnych tabletkach i z taŭrom «kasilščyka», pakul, urešcie, u Minsku ŭ jaho nie dyjahnastavali ankałohiju z množnymi mietastazami, adrazu ŭ čaćviortaj stupieni!
Na pytańni «Našaj Nivy» adkazaŭ načalnik vajenna-miedycynskaha ŭpraŭleńnia Ministerstva abarony pałkoŭnik Dźmitryj Alchovik.
Najpierš jon patłumačyŭ, što niepasredna Ministerstva abarony nie adkazvaje za nabor sałdat — heta robić pryzyŭnaja kamisija, a kamisaryjat tolki realizuje.
Takim čynam, kłapacicca ab sałdacie Ministerstva pačynaje ŭžo tady, kali jon prybyŭ u čaść. Pavodle słovaŭ pradstaŭnika Minabarony, analizy ŭ chłopca pierad vojskam byli zdavalniajučyja.
Dźmitryj Alchovik zhodna z zakonam nie maje prava vydavać miedycynskich tajamnic, tamu kazaŭ ahulnymi frazami.
Hałoŭnaje — čamu ankałohiju vyjavili ŭžo na apošniaj stadyi?
«Što ź siabie ŭjaŭlaje straŭnik? U vizualnym płanie heta miašočak. Ankałohija zvyčajna vyjaŭlajecca takim čynam: puchlina pavialičvajecca, zvužajecca praśviet hetaha «miašočka», ježa zastojvajecca, što vyklikaje niepryjemnyja pačućci i skarhi, i viadzie da dyjahnostyki. U hetaj situacyi miełasia redkaja forma ankałohii, jakaja nie była puchlinaj, a prajadała sam orhan. Tamu simptamatyka była prychavanaja i vyjaviłasia na poźniaj stadyi, kali źjavilisia kankretnyja skarhi», — skazaŭ nam Alchovik.
Ale ž siamja śćviardžaje, što Michaił ad samaha pačatku skardziŭsia na zdaroŭje?
«U mianie pad rukoj chranałohija jahonych zvarotaŭ da miedykaŭ. I ŭ Piečach, i ŭ Słonimie heta nie skarhi na straŭnik, a skarhi na prastudnyja zachvorvańni, što dla sałdat nie redkaść. I jamu akazvałasia dapamoha. Źviarnu ŭvahu, što adrazu ž, paśla pieršaj skarhi pa pradmiecie razmovy, jakaja adbyłasia ŭ krasaviku 2019-ha, jon byŭ pradyjahnastavany ŭ admysłovym miedycynskim centry. Heta ŭsio vyjaviłasia, sabraŭsia kansilium. Vyrašali, što rabić dalej. Da nas pryjazdžała jahonaja siastra. Zvyčajna praz chvaroby hramadzian kamisujuć, u kankretna hetym vypadku ministr abarony pryniaŭ rašeńnie pakinuć sałdata dla reabilitacyi. Kažučy prosta, jaho lačyli. Praviali chimijaterapiju i nastupnuju reabilitacyju, a potym adpuścili dadomu. Vielmi škada, što jon pamior», — reziumavaŭ Alchovik.
