U druhim kvalifikacyjnym raŭndzie Lihi čempijonaŭ u supierniki BATE vypaŭ narviežski «Rusienborh». Voś zusim nie skažaš, što našamu čempijonu šancuje ź losavańniem. I na miescy «Piasta», i na miescy «Rusienborha» mahli być značna praściejšyja apanienty. Ale BATE za svaju jeŭrakubkavuju historyju prachodziŭ i nie takija kamandy.
Pieršaja hulnia znoŭ prajšła ŭ Barysavie. Kali ŭ matčy z «Piastam» BATE časam pakidaŭ zusim ciažakie ŭražańnie, to na hety raz usio było značna viesialej.
U skład viarnuŭsia paśla dyskvalifikacyi Stanisłaŭ Drahun, što značna palepšyła jakaść hulni ŭ centry pola. A na miesca Jase Tuominiena vyjšaŭ Niemańja Milič, jaki zarabiŭ pienalci ŭ hulni z «Piastam» u Hlivicach.
Na matč byli pradadzienyja ŭsie bilety, ale anšłahu, na žal, znoŭ nie atrymałasia. Mabyć, ułaśniki abaniemientaŭ na siezon nie ŭsie dajšli da stadyjona.
Z Narviehii ŭ Biełaruś pryjechała ź dziasiatak fanataŭ, ale ich na ahulnym fonie nie było čuvać.
«Rusienborh» — viadomaja z kanca 90-ch kamanda, jana nieadnarazova hulała ŭ Lizie čempijonaŭ, dzie pieramahała «Reał» i «Barusiju». Na siońnia čempijony Biełarusi i Narviehii prykładna adnaho ŭzroŭniu.
Hulnia dla BATE pačałasia zvyšudała. Užo na čaćviortaj chvilinie padčas rozyhryšu kutniaha ŭ varatarskaj placoŭcy byŭ źbity Zachar Vołkaŭ. Da miača padyšoŭ Ihar Stasievič, jaki ŭ takich vypadkach nie zvyksia daravać — 1:0.
BATE i dalej vałodaŭ inicyjatyvaj, ale hoł atrymaŭ u svaje varoty. Znoŭ halavaja ataka pačałasia z kutniaha. Supiernika ŭpuściŭ Jaŭhien Jabłonski i Anders Konradsen pierajhraŭ ź blizkaj adlehłaści Čyčkana — 1:1.
U druhim tajmie ž była procilehłaja situacyja. Jaho z atak pačaŭ «Rusienborh», adnak na 51-j vymaŭ miač sa svaich varot. Heta Ihar Stasievič addaŭ čarhovuju hrosmajstarskuju pieradaču, Maksim Skavyš adarvaŭsia ad abaroncaŭ i spakojna pierakinuŭ miač u varoty — 2:1. Litaralna praz chvilinu hledačy tradycyjna ŭstali ź miescaŭ, kab ušanavać pamiać Anatola Kapskaha. Bolš hałoŭ u matčy nie było.
Taki lik, kaniečnie, pakidaje dla «Rusienborha» miesca dla manieŭru, ale aptymizmu nadaje toje, što hulnia ŭ BATE vyhladaje bolš celnaj, čym z «Piastam».
Matč u adkaz adbudziecca 31 lipienia ŭ Tronchiejmie. Pačatak a 20:00.
