Fota: pres-słužba prezidenta Ukrainy
Žurnalist pryvodzić scenu ź vizitu Uładzimira Zialenskaha na adzin z bujnych ukrainskich zavodaŭ. Supracoŭniki skardziacca novamu prezidentu na toje, što staličnaja ŭłada zamoviła ŭ pradpryjemstva tramvaj, ale tak i nie raźličyłasia.
Zialenski vyrašaje patelefavanać meru Kijeva Vitalu Kličko dla «mužčynskaj razmovy».
«Ało, Vital Uładzimiravič?, — pytajecca jon sa znajomaj chrypinkaj u hołasie. — Vitaju. Heta Zialenski Uładzimir, vy na hučnaj suviazi».
Ironija situacyi ŭ tym, što telefon, praź jaki idzie hutarka, naležyć nie Zialenskamu, a Bohdanu. I trymaje jaho nie Zialenski, a Bohdan.
Fota: pres-słužba prezidenta Ukrainy
«Da mianie źviartajucca, jak da prezidenta, — praciahvaje Zialenski. — A što ja mahu? Ja telefanuju vam… Ale hałoŭnaje navat nie zapazyčanaść. Hałoŭnaje — jany chacieli ŭziać udzieł u tendary. A ŭ tendary ciapier… u farmacie tendara ŭnieśli…» — prezident pačynaje hublacca i šukaje patrebnyja słovy.
Bohdan nie vytrymlivaje, padnosić telefon da svaich vusnaŭ dy pačynaje tłumačyć: «Kvalifikacyjnyja ŭmovy tendara prapisanyja takim čynam, što ŭkrainski vytvorca nie moža brać udzieł».
«…brać udzieł», — paŭtaraje słovy Bohdana prezident, viartajučysia na chvalu svajho firmovaha naporu.
Hetaja karcina z natury mahła b zrabicca idealnaj ilustracyjaj taho, jak žyvie novaja ŭkrainskaja ŭłada, piša žurnalist.
Ambicyi Uładzimira Zialenskaha ablamavanyja aparatnickaj vynachodlivaściu Andreja Bohdana — voś hałoŭnaja siła, jakaja kiruje krainaj.
Hetyja składovyja častki ciažka adździalić adnu ad inšaj, i nie mienš składana vyznačycca: jakaja ž ź ich hałoŭnaja?
Parašenka byŭ schilny da «mikramieniedžmientu».
Jamu byli patrebnyja efiektyŭnyja vykanaŭcy jahonych ułasnych idej. Usie pracesy ŭ byłoj administracyi byli «parašenkacentryčnymi» — prezident sam spuskaŭ kamandy i sam kantralavaŭ ich vykanańnie.
U administracyi — ci, jak jaje ciapier nazyvajuć, Ofisie — Zialenskaha usio inakš. Žurnalist nazyvaje jaho «bohdanacentryčnym».
Pryčynaŭ niekalki:
Pa-pieršaje, svaim prezidenctvam Zialenski abaviazany mienavita Bohdanu. Faktyčna, Bohdan byŭ pieršym, chto pavieryŭ u mahčymaść jaho pieramohi i patraciŭ šmat času na toje, kab pierakanać komika pajści va ŭładu.
Pa-druhoje, Bohdan — ličy, adziny čałaviek u kamandzie Zialenskaha, jaki maje dośvied palityčnych kampanij i pracy va ŭradzie.
Usie členy kamandy litaralna zazirajuć Bohdanu ŭ rot i rajacca ź im na kožnym kroku.
Pra toje, nakolki važny Bohdan dla Zialenskaha, śviedčyć toje, što prezident parušyŭ normy zakonu pra lustracyju, kab pryznačyć jaho. Zialenskaha nie spyniła navat toje, što pryznačeńnie Bohdana pryviało da niepubličnaha kanfliktu z amierykanskaj administracyjaj, jakaja nastojliva raiła dystancyjavacca ad «jurysta Kałamojskaha». Surazmoŭcy Ukrainskaj praŭdy ŭ amierykanskich dypłamatyčnych kołach kažuć, što vizit Zialenskaha ŭ ZŠA pieranosicca ŭ tym liku i z-za situacyi z Bohdanam.
«Heta taki tonki namiok, što Zialenski pajšoŭ suprać žadańniaŭ amierykanskaha boku», — śćviardžaje krynica vydańnia.
Zialenski maje imidž «prostaha chłopca», «nie śpiecyjalista», «takoha, jak usie». Heta padabajecca vybarcu. Ale, kali havorka idzie pra kiravańnie dziaržavaj, to jamu, kab nie vyhladać prafanam, duža patrebny toj, chto zdolny chutka i prosta patłumačyć, čaho žadajuć ad prezidenta, i małankava padkazać na vucha, što prezidentu treba skazać.
Fota: «Vidkritij TV»
Bohdan ź jaho imhniennaj reakcyjaj i advakackaj vynachodlivaściu jak nichto inšy padychodzić na hetuju rolu.
Faktyčna, Bohdan — heta suflor, schavany ŭ prezidenckaje vucha.
Praŭda, heta vielmi zaŭvažny suflor, jaki časam nastolki zachaplajecca svaim upłyvam, što Zialenski musić jaho asadžvać prosta na vačach usich: «Dy pačakaj… daj dasłuchać».
Upłyŭ Bohdana sapraŭdy kałasalny.
Na pravach «pieršaha siarod roŭnych» u kamandzie Zialenskaha kiraŭnik Ofisa prezidenta zajmajecca litaralna ŭsim: farmavańniem paradku dzionnaha, składańniem śpisaŭ, daboram mažarytarnikaŭ, napisańniem zakonaprajektaŭ, kamunikacyjaj z roznymi hrupami ŭpłyvu va ŭładzie, «naviadzieńniem mastoŭ» ź siłavikami i «kamunikacyjaj» z Kanstytucyjnym sudom.
Časam zdajecca, što niama anivodnaj śfiery, dzie nie było b «ruki Bohdana».
Žurnalist parazmaŭlaŭ z adnym ź ministraŭ (jaho imia nie nazyvajecca), jaki miarkuje, što Zialenskaha trymajuć u peŭnaj izalacyi.
«Kali vobrazna, to Bohdan-Šefir-inšyja — jany namahajucca trymać Zialenskaha ŭ zručnym dla jaho futarały, pamiž svaimi», — kaža čynoŭnik, jaki namahaŭsia prabicca praź ścienki hetaha «futarała» da kiraŭnika dziaržavy.
Krynicy haziety ŭ kamandzie prezidenta kažuć, što asablivaj lubovi da Bohdana niama, bo jon byvaje hrubym ź ludźmi. Ale ŭsie razumiejuć, što jon adziny ŭ atačeńni Zialenskaha, chto zdolny ŭtrymać hety biurakratyčny karabiel na płyvu.
Pakul što takaja kanfihuracyja ŭłady zadavalniaje i Zialenskaha, i reštu jaho kamandy, robić vysnovu aŭtar rasśledavańnia.
Bohdan ihraje rolu daśviedčanaha instruktara, jaki ŭ harach dapamahaje hrupie alpinistaŭ dasiahnuć viaršyni.
Ale ź ciaham času, asabliva paśla parłamienckich vybaraŭ, situacyja moža źmianicca. Historyja Ukrainy ŭžo viedała takija prykłady. Dla «čyrvonaha dyrektara» Leanida Kučmy pravadnikom u śviet vialikaj palityki na pieršych etapach paśla prezidenckich vybaraŭ 1994 h. byŭ kiraŭnik jaho vybarčaj kampanii Dźmitryj Tabačnik. Ale potym toj zahulaŭsia ŭ aparatnyja hulni i byŭ vyhnany z administracyi prezidenta, kab nikoli tudy nie viarnucca.
