Siońnia, 6 maja kala 11:30 hadzin u siała Bystrec, što ŭ Vierchavinskim rajonie Ivana-Frankoŭskaj vobłaści, hruzavy aŭtamabil źlacieŭ z abryvu vyšynioj 40 m i ŭpaŭ u raku Čorny Čaramoš.
Padrabiaznaści hibieli biełaruskich turystaŭ u Karpatach paviedamili ŭ palicyi Ivana-Frankoŭskaj vobłaści Ukrainy.
Palicyja vyznačyła, što 47-hadovy kiroŭca aŭtamabila nie spraviŭsia z kiravańniem na ŭzdymie, u vyniku čaho aŭtamabil pačaŭ ruch nazad i pierakuliŭsia ŭ raku. Kiroŭca — žychar adnaho ź siołaŭ Kosaŭskaha rajona — kiravaŭ u stanie ałkaholnaha apjanieńnia. Heta paćvierdziła miedycynskaja ekśpiertyza. Kiroŭca znachodzicca ŭ stanie šoku, abyšoŭsia siniakami.
U hruzaviku znachodzilisia 24 čałavieki (23 turysty ź Biełarusi i vadziciel). Papiarednie viadoma, što hrupa turystaŭ ź Biełarusi pavinna była ažyćciavić spłaŭ pa race i kiravałasia da miesca pryznačeńnia.
U vyniku DTZ try čałavieki zahinuli na miescy: 23-hadovaja i 28-hadovaja hramadzianki Biełarusi i 29-hadovy hramadzianin Biełarusi.
Jašče 9 čałaviek va ŭzroście ad 21 da 49 hadoŭ prachodziać miedycynskaje abśledavańnie ŭ rajonnaj balnicy z roznymi traŭmami. Inšym pasažyram akazana dapamoha na miescy zdareńnia.
MZS udakładniaje: u DTZ va Ukrainie zahinuli 3 biełarusy, 10 atrymali traŭmy
Dla dapamohi byli pryciahnutyja jak palicejskija i ratavalniki, tak i inšyja turysty, jakija ažyćciaŭlali spłaŭ.
Zaviedziena kryminalnaja vytvorčaść pa č. 3 art. 286 KK Ukrainy (parušeńnie praviłaŭ biaśpieki darožnaha ruchu abo ekspłuatacyi transpartu asobaj, jakaja kiravała transpartnym srodkam, što paciahnuła hibiel niekalkich asob, — karajecca pazbaŭleńniem voli na termin ad piaci da dziesiaci hadoŭ z pazbaŭleńniem prava kiravać transpartnymi srodkami na termin da troch hadoŭ).
Kiroŭca zatrymany. Nieŭzabavie jamu abvieściać padazreńnie, a taksama sud vyznačyć mieru strymańnia.