Ab hetym zajaviŭ staršynia KDB Valeryj Vakulčyk na naradzie pa pytańniach udaskanaleńnia dziejnaści sudoŭ ahulnaj jurysdykcyi, piša BiełTA.
Staršynia KDB adznačyŭ, što pradstaŭniki sudovaj sistemy ŭ paraŭnańni ź inšymi katehoryjami słužbovych asob źjaŭlajucca najbolš padvieržanymi sprobam cisku z boku ŭdzielnikaŭ pracesu, ich prychilnikaŭ. U tym liku časam fiksujucca fakty sprobaŭ akazańnia psichałahičnaha ŭździejańnia na kankretnych sudździaŭ. Pry hetym padklučajuć tak zvanuju hramadzianskuju supolnaść, šerah ŚMI, pravodziać ahitacyjnyja kampanii, publikujuć piersanalnyja dadzienyja sudździaŭ i ich svajakoŭ.
Valeryj Vakulčyk źviarnuŭ uvahu i na aśviatleńnie sudovych pasiadžeńniaŭ u šerahu ŚMI, kali vychoplivali z kantekstu tyja ci inšyja epizody i padavali ŭ pierakručanym vyhladzie.
«Byccam by fakt paviedamili, ale ž rašeńnie prymajecca i dumka składajecca na padstavie razhladu sukupnaści ŭsich dokazaŭ i pa vynikach ŭsiaho pracesu. Akramia taho, što heta ŭpłyvaje na vystup inšych śviedak, heta i sproba padnieści tyja ci inšyja rečy ŭ pierakručanym vyhladzie, uvieści ŭ zman hramadskaść», — skazaŭ jon.
Pa słovach staršyni KDB, usio heta nieabchodna ŭličvać, kab minimizavać niehatyŭnyja nastupstvy i imknucca danieści da hramadskaści spraviadlivuju i abjektyŭnuju infarmacyju.
«Razam z tym my ćviorda bačym, što hetyja sproby nie dasiahajuć svajho vyniku i, niahledziačy na cisk, faktaŭ admovy ad razhladu vostrych kryminalnych, administracyjnych spraŭ, sprobaŭ pierakładańnia adkaznaści albo pryniaćcia supiarečlivych rašeńniaŭ z boku sudździaŭ nie zafiksavana», - zajaviŭ Valeryj Vakulčyk.
