U Kurapatach 16 lutaha adbyŭsia čarhovy incydent. Aŭtamabil «Łada» ździejśniŭ najezd na lidara «Maładoha fronta» Dzianisa Urbanoviča. Najezd byŭ dastatkova mocny, što Dzianisa chutkaja dapamoha adviezła ŭ balnicu.
Źbity Dzianis Urbanovič.
Jak potym vyśvietliłasia, za rulom aŭto byŭ muzyka, kantrabasist Anatol Łabanok. Jon pryjazdžaje vystupać u restaran «Pajedziem, pajadzim». Adna z abaroncaŭ Kurapataŭ Hanna Šapućka kaža, što Łabanok navat nie źbiraŭsia spyniacca i jechaŭ pa sustrečnaj pałasie. U Dzianisa Urbanoviča niama pierałomaŭ, ale jość mocnyja ŭdary.
Milicyja pravodziła ekśpierymient z Anatolem Łabankom, u muzyki zabrali pravy. Mašyna była zarehistravanaja na jahonuju dačku Natallu, jakaja taksama potym pryjechała ŭ Kurapaty.
Anatol Łabanok hraje na kantrabasie, a taksama vučyć dziaciej ihry na hitary ŭ dziciačaj muzyčnaj škole Minska №18. Kaliści jon vystupaŭ ź biełaruskim bardam Alesiem Kamockim. Praŭda, Kamocki skazaŭ, što suviazi daŭno zhublenyja i apošni sumiesny vystup byŭ u 2014 hodzie.
Nam udałosia źviazacca z Anatolem Łabankom, kab pačuć jahonuju viersiju zdareńnia.
Kantrabasist Anatol Łabanok.
«Ja pabačyŭ, što hetyja ludzi vykłali ŭ internet pra mianie, i zrazumieŭ, što sutyknuŭsia z podłymi i chłuślivymi ludźmi. Heta čystaja pravakacyja. Jość ułady, jakija raźbiarucca i vyniesuć vierdykt, chto maje racyju, a chto nie maje.
Ja nie chaču ničoha kazać, bo ŭžo vysłuchaŭ pra siabie stolki brudu: i pra svajo proźvišča, i pra pachodžańnie.
Ja raniej dumaŭ, što Biełaruski narodny front [BNF jak arhanizacyja nie pikietuje «Pajedziem, pajadzim», ale tam udzielničajuć asobnyja siabry arhanizacyi — «NN»] — heta prystojnyja ludzi, jakija rupiacca pra nacyjanalnuju śviadomaść, a jany prosta čutki źbirajuć i ablivajuć brudam.
Na mianie stali kazać, što ja rasijanin, što ŭ mianie dzied u NKVD słužyŭ. Adrazu tak stali abhavorvać. U mianie partyzanskija karani, što z maminaj linii, što z baćkavaj. Jany navat historyi svajoj nie viedajuć.
U Kurapatach niachaj źbirajuć hrošy, staviać pomniki, vianki, źbirajucca, uspaminajuć. A nie hetymi radykalnymi mietadami, što heta za mietady takija? Luby mir lepšy za vajnu. A heta vajna! Na maleńkim uzroŭni, ale vajna, pravakacyja.
Na jakoj asnovie vy pieraharodžvajecie darohu? Chto im daŭ prava? Jany nie razumiejuć, što parušajuć praviły darožnaha ruchu? Pryčym płanamierna parušajuć. Tam historyi niama, heta pastanovačny momant.
Što tam u internecie napisali? Što jon pabiŭ hałavu? Heta niapraŭda! Udar plača i ŭsio. Ja ž bačyŭ daviedki. Nichto nijakich hałovaŭ nie biŭ, bł… Ja vam skazaŭ usio, što chacieŭ, bolš nie telefanujcie mnie».
