29-hadovy ŭkrainiec Jarasłaŭ Rakicki padpisaŭ kantrakt na 3,5 hoda ź picierskim «Zienitam». Da hetaha ŭ bijahrafii futbalista byŭ usiaho tolki adzin kłub — daniecki «Šachcior», za jaki jon pravioŭ bolš za trysta hulniaŭ.
Va Ukrainie, viadoma, taki tranśfier nie ŭspryniali z entuzijazmam. Na Rakickaha lacić dosyć šmat krytyki. Ale samim pierachodam u kłub «Hazprama» tam mała chto ździviŭsia. A čamu tak?
Sam Rakicki z haradka Pieršatravieńsk Dnieprapiatroŭskaj vobłaści. U abłasnym centry, Dniapry, žyvuć i baćki hulca. U trynaccać hadoŭ jon trapiŭ u škołu danieckaha «Šachciora», dzie prajšoŭ usie prystupki staleńnia.
Rakicki — centralny abaronca. Adzin z najbolš nadziejnych u svaim ampłua na postsavieckaj prastory. Zdajecca, Ukraina pavinna tolki radavacca takomu vykanaŭcu, ale nie ŭsio tak prosta.
I chacia Rakicki pravioŭ zvyš piacidziesiaci matčaŭ za nacyjalnuju zbornuju Ukrainy, ale balelščyki ŭsio adno zastavalisia im niezadavolenyja.
Sprava ŭ tym, što Rakicki pryncypova nikoli nie vykonvaje nacyjanalny himn Ukrainy. A jašče nie trymaje ruku na sercy, kali jon vykonvajecca. Naturalizavanyja brazilcy trymajuć, a Rakicki — nie.
«Ja viedaju słovy himna, ale nie śpiavaju. Prosta tak nie śpiavaju. Nastrojvajusia na matč, kab pakazać najlepšuju hulniu», — kazaŭ jon.
Daje padstavu dla razmovaŭ Rakicki i inšymi ŭčynkami. Naprykład, jon nikoli nie vykazvaŭsia ŭ padtrymku ŭkrainskich sałdataŭ, jakija vajujuć na ŭschodzie krainy. Zatoje adnojčy łajknuŭ sa svajho akaŭnta ŭ instahramie parad u honar čarhovaj hadaviny «DNR». Kali pra heta pačalisia razmovy, to «padabajku» futbalist vydaliŭ.
Inšy hulec danieckaha «Šachciora» Andrej Piataŭ u svoj čas uvohule fotkaŭsia ź sieparatystami z hieorhijeŭskimi stužkami. Treniera zbornaj Andreja Šaŭčenku navat prasili nie vyklikać hetych futbalistaŭ u stan zbornaj.
Rakicki vielmi lubić rodny Danieck. Jon nabivaje na skury tatuiroŭki z vyjavaj horada. A paśla pieramoh piša: «Danbas, ty ŭ našych sercach, hetyja pieramohi dziela vas».
U sacyjalnych sietkach futbalist Rakicki moža pavinšavać žycharoŭ Daniecka z Dniom šachciora, zatoje zaŭsiody ihnaruje aficyjnyja ŭkrainskija śviaty. Jeździŭ na adpačynak u Krym užo paśla akupacyi paŭvostrava.
Letaś paśla hulni «Šachciora» i kijeŭskaha «Dynama» adzin z balelščykaŭ kijaŭlan vyskačyŭ na pole i ŭdaryŭ Rakickaha. Toj adreahavaŭ spakojna: «Heta balelščyki, heta narmalna. Ja prapanavaŭ jamu vyjści adzin na adzin, ale toj admoviŭsia».
Kali ŭžo stała viadoma pra pierachod u «Zienit», to fanaty «Šachciora» napisali ŭ svaim tvitary: «Rak [mianuška Rakickaha — «NN»], vybar nie ŭchvalajem. Ale dziakuj za pryceły, optyku, spalniki i druhija rečy, dziakuj!» Jasna, što nijakaj dapamohi bajcam ATA Rakicki nie akazvaŭ.
Ciapier zaŭziatary spračajucca, ci varta Rakickaha dalej vyklikać pad ściahi zbornaj. Zrešty, ci pajedzie sam Jarasłaŭ.
