U aŭtorak na pradpryjemstvie PSUP «Linija znosu» zaharełasia dranka. Pažar byŭ składany, tušyli ŭvieś dzień i noč. Svaju videaspravazdaču vyrašyŭ padrychtavać i homielski błohier Maksim Filipovič. Niejki čas jon zdymaŭ na videa toje, što adbyvajecca, z akna svajoj kvatery, ale paźniej vyrašyŭ rušyć na miesca nadzvyčajnaha zdareńnia.
Na terytoryi, dzie ratavalniki ŭžo nie pieršuju hadzinu zmahalisia z ahniom, da Filipoviča padyšoŭ supracoŭnik MNS, kab vyśvietlić, što pabočny čałaviek robić u niebiaśpiečnaj zonie — i pačuŭ u svoj adras mnostva abraźlivych vyrazaŭ. Pry hetym u roliku bačna, što supracoŭnik ŭsialak imkniecca nie abvastrać i biez taho napružanuju abstanoŭku, a voś ton razmovy błohiera z vyratavalnikam — adkryta niepavažlivy i zadzirlivy.
U sacsietkach bolšaść karystalnikaŭ aburylisia pavodzinami Filipoviča. Nieabyjakavyja hamielčuki navat stvaryli pietycyju na adras UUS Homielskaha abłvykankama z prośbaj pryciahnuć jaho da kryminalnaj adkaznaści za abrazu.
«Pažarnyja tolki i paśpiavali jeździć pa vadu i viartacca nazad. Usiu noč na miescy pracavaŭ štab MNS, a taksama niekalki pažarnych raźlikaŭ. Na kadrach videa błohier zdymaje pažar na pradpryjemstvie. Zatym da jaho padychodzić supracoŭnik MNS dla taho, kab vyśvietlić, što jon robić u niebiaśpiečnaj zonie. Na što błohier adkazaŭ biez usiakaj vietlivaści i pavahi: «Idzi hulaj… Synok», — i hetak dalej. Dalej błohier padyšoŭ da słužbovaha aŭtamabila MNS: «Šo vy hladzicie, akno apuści…» Pakolki rabotniki MNS znachodzilisia pry vykanańni, prosim pryciahnuć błohiera Filipoviča da kryminalnaj adkaznaści pa č. 2. art. 189 KK RB [abraza] », — napisana ŭ zvarocie.
Pietycyju ŭžo padpisali bolš za 250 čałaviek.
Błohier Maksim Filipovič u sudzie 23 sakavika 2017 hoda. Fota: Ivan Jaryvanovič, TUT.BY
TUT.BY spytaŭ MNS pra toje, jak budzie reahavać viedamstva na apublikavanaje videa i pavodziny błohiera.
— Dumaju, vašy čytačy zrazumiejuć, kali MNS ustrymajecca ad kamientaroŭ, i sami zrobiać vysnovy paśla prahladu videa, — skazaŭ aficyjny pradstaŭnik MNS Vital Navicki.
Darečy, u dadzienym vypadku havorka moža iści taksama ab pryciahnieńni čałavieka da administracyjnaj adkaznaści pa art. 23.5 KaAP za abrazu słužbovaj asoby pry vykanańni im słužbovych paŭnamoctvaŭ — za heta pahražaje štraf ad 20 da 50 bazavych vieličyń.
Jak stała viadoma TUT.BY, milicyja pravodzić pravierku pa fakcie incydentu.
