Mitrapalit Mienska‑Mahiloŭskaj dyjacezii arcybiskup Tadevuš Kandrusievič uspaminaje pra pamierłaha Alaksija II.
«Padčas plenarnaha pasiadžeńnia Kanfierencyi Katalickich Biskupaŭ u Biełarusi da nas z Maskvy pryjšła viestka ab tym, što pamior Patryjarch Maskoŭski i ŭsiaje Rusi Alaksij II. Ja asabista dobra viedaŭ hetaha čałavieka, vielmi časta sustrakaŭsia ź im na nabaženstvach. Jon taksama prymaŭ mianie ŭ svajoj rezidencyi. Napeŭna, na jaho los vypała šmat nialohkich spravaŭ, jakija jon pavinien byŭ vyrašyć.
Ja dobra pamiataju toj dzień, kali na pasadu ŭstupaŭ pieršy Prezident Rasijskaj Fiederacyi Barys Jelcyn. U toj dzień Patryjarch skazaŭ jamu: «Vy prymajecie abaviazak kiravać chvoraj krainaj».Patryjarch, pierš za ŭsio, mieŭ na ŭvazie toje, što kraina była chvoraja duchoŭna. Bo try pakaleńni pieraśledu viery, try pakaleńni hanieńniaŭ na Carkvu zrabili svajo, i Patryjarchu treba było adnaŭlać ŭsio heta. Sapraŭdy, adbudavanyja cerkvy, vydadzienaja litaratura, adkryćcio sieminaryj i stvareńnie novych dyjacezij — usio heta havoryć ab tym, što jon sapraŭdy z hetych kavałkaŭ, z hetych askołkaŭ sabraŭ Carkvu.
Padčas jaho słužeńnia Maskoŭskim Patryjarcham Ruskaja Pravasłaŭnaja Carkva stała viadomaj va ŭsim śviecie. Nie tak daŭno jon byŭ u Biełarusi na śviatkavańni 1020‑hodździa chryščeńnia Rusi, padčas jakoha jon vielmi mnoha havaryŭ ab tym, što ŭsie chryścijanie pavinny być adno. Pavinien ździejśnicca zaklik našaha Pana Jezusa Chrysta — kab usie byli adno. Heta byŭ zaklik Jezusa Chrysta pierad Jaho śmierciu, Jon viedaŭ, što buduć razłomy, buduć ciažkaści ŭ Jaho Carkvie, u adzinaj Carkvie, bo Jon stvaryŭ adzinuju Carkvu. Hetyja razłomy — heta rana, jakaja kryvatočyć da siońniašniaha dnia. Chrystus zaklikaŭ da adzinstva chryścijanaŭ, u imia taho, kab my ŭsie razam śviedčyli adno Jevanhielle, asabliva heta važna siońnia, u čas siekularyzmu, kali čałaviek sam admaŭlajecca ad chryścijanskich karanioŭ, u čas, kali čałaviek buduje svajo žyćcio, svaju budučyniu tolki na materyjalnym fundamiencie.
Siońniašni finansavy kryzis pakazvaje, što toj, chto buduje tolki na materyjalnym fundamiencie, buduje tolki na piasku. Tamu zmahańni Patryjarcha majuć vielmi vialikaje značeńnie. My da serca pryniali hetuju viestku z Maskvy pra toje, što pamior Patryjarch. Usie katalickija biskupy Biełarusi i šmatlikija śviatary, prysutnyja na siońniašnim plenarnym pasiadžeńni Kanfierencyi Biskupaŭ, pamalilisia ab supakoi dušy pamierłaha Patryjarcha».
