Ułady KNR źbirajucca padniać nieabkładany padachodnym padatkam minimum z 3,500 juaniaŭ na miesiac (kala 512 dołaraŭ) da 5,000 juaniaŭ (bolš za 700 dołaraŭ), piša China Daily.
Heta robicca dla taho, kab dać ludziam mahčymaść pakinuć sabie bolš hrošaj na asabistyja traty — što dapamoža ažyvić spažyviecki rynak i padšturchnie rost ekanomiki.
Kitaj tradycyjna ličyŭsia krainaj tannaj pracoŭnaj siły, ale hetyja časy sychodziać u minułaje. Siaredniamiesiačny zarobak u Kitai ŭžo pieravyšaje 900 dołaraŭ — ličy, u dva razy bolš za toje, kolki maje siaredniestatystyčny biełarus.
Užo ciapier u Kitai vyzvalenyja ad padachodnaha zarobki tak zvanaha ŭzroŭniu «papiccot» — taho samaha, jakoha my ŭsio anijak nie možam dasiahnuć.
Što praŭda, u Biełarusi pryvatnyja asoby — niezaležna ad taho, chto kolki zarabiŭ — płaciać 13% padachodnaha padatku (a ajcišniki z PVT dyk uvohule tolki 9%). U Kitai škała prahresiŭnaja — čym bolš zarablaješ, tym bolšy padatak.
Staŭka padachodnaha padatku ŭ Kitai dachodzić ažno da 45% na zarobki, bolšyja za 11 tysiač dołaraŭ u ekvivalencie.
Ale i heta, mahčyma, chutka źmienicca. Kitajskija ekśpierty miarkujuć, što sapraŭdnyja bahaciei — heta tyja, chto atrymlivaje prybytak nie ŭ vyhladzie zarobku, a jak dachody ad inviestycyjaŭ ci prodažu aktyvaŭ. Tamu, mahčyma, zamiest vysokich padatkaŭ na vialikija zarobki varta lepiej padniać padatki na majomaść.
Darečy, zhodna China Daily, ad studzienia pa lipień žychary krainy zapłacili bolš za 136 miljardaŭ dołaraŭ padachodnaha padatku (kali pieravieści ź juaniaŭ). Heta ŭ 113 razoŭ bolš za toje, kolki padachodnaha padatkaviki sabrali za toj ža čas z žycharoŭ našaj krainy.
Udakładnieńnie
U pačatkovym varyjancie artykuła prapanavanaja suma nieabkładanaha zarobku pamyłkova nazyvałasia jak 7000 juaniaŭ. Na samoj spravie heta 5000 juaniaŭ.
