Sud Śvietłahorskaha rajona vynies prysud mužčynu, jaki sprabavaŭ pieradać siabru ŭ izalatar časovaha ŭtrymańnia marychuanu i alfa-PVP u zavarnych pirožnych.
5 sakavika minułaha hoda ŭ AUS Śvietłahorskaha rajvykankama ŭvajšła žonka adnaho z aryštantaŭ. Maładaja žančyna pryniesła mužu pieradaču, jakaja ŭklučała niekalki rečaŭ: skrynku prateinu, blincy ź livierkaj, sałatu i vosiem zavarnych pirožnych. Supracoŭniki milicyi panieśli pieradaču, a praź niekalki chvilin žančynu zatrymali: u dvuch kremavych pirožnych vyjavili dva palimiernyja pakiety, jak paźniej vyśvietliłasia, z narkotykami: adzin — z marychuanaj (0,36 hrama), druhi — z alfa-PVP (0,1236 hrama ). Spałochanaja žančyna adrazu zdahadałasia, jakim čynam zabaronienyja rečyvy patrapili ŭ jaje nošu, i tut ža raspaviała pra ŭsio pravaachoŭnikam.
Akazałasia, ź joj źviazaŭsia muž, jaki aryštavany i ŭtrymlivajecca ŭ kamiery izalatara, i paprasiŭ zabrać u znajomaha toje, što nieabchodna jamu pieradać. Z razmovy z mužam žančyna zrazumieła: pieradača pryznačałasia dla kahości z susiedziaŭ pa kamiery.
I znajomy muža sapraŭdy pryjšoŭ. Jon pradstaviŭsia Dzianisam i addaŭ žančynie sumku, u jakoj taja znajšła pakiet ź dzieviaćciu pirožnymi i skrynku prateinu. Nie padazrajučy pra sakretnyja inhredyjenty, jana pačastavała adnym pirožnym svaju maleńkuju dačku, dadała da pieradačy blincy i sałatu i adpraviłasia ŭ izalatar.
Padazravanaha naviedali supracoŭniki milicyi, adnak doma nie zastali. Pa miescy žycharstva narkotyki nie znajšli, zatoje pašpart i inšyja dakumienty znachodzilisia na miescy. Baćki nie viedali, dzie ich syn, adnak paźniej vyśvietliłasia, što Dzianis źjechaŭ u Rasiju.
Padazravany viarnuŭsia ŭ Biełaruś tolki ŭ kastryčniku minułaha hoda. Cikava, što na sudzie jon śćviardžaŭ: žančyna, jakaja pryniesła ŭ izalatar hetyja pirožnyja, ahavaryła jaho, kab paźbiehnuć kryminalnaj adkaznaści. Sud Śvietłahorskaha rajona pryznaŭ Dzianisa Kachančyka vinavatym. Jamu pryznačyli pakarańnie ŭ vyhladzie 12 z pałovaj hadoŭ pazbaŭleńnia voli ŭ kałonii asablivaha režymu.
