Staŭka ekspartnaj pošliny na syruju naftu ŭ Biełarusi z 1 listapada źnižana z $372,2 za 1 t da $287,3. Adpaviednaje rašeńnie źmiaščajecca ŭ pastanovie ŭrada numar 1668, paviedamili BIEŁTA u Aparacie Saŭmina.
Pamier pošliny skarekciravany ŭ suviazi z anałahičnym źnižeńniem ekspartnaj pošliny na naftu z 1 listapada ŭ Rasijskaj Fiederacyi. Da ŭzroŭniu rasijskich źmienšany i ekspartnyja pošliny na naftapradukty. Tak, pošlina na śvietłyja naftapradukty (lohkija i siarednija dystylaty, hazojli, zvadkavanyja hazy, bienzoł, tałuoł, ksiłoły) składzie $205,9 za 1 t suprać raniejšych $263,1. Na ciomnyja naftapradukty (masły, adpracavanyja naftapradukty, minieralnyja voski, koks naftavy, bitum naftavy i inšyja astatki naftapierapracoŭki) - $110,9 za 1 t (raniejšaja staŭka - $141,7 za 1 t).
U adpaviednaści ź mižuradavym biełaruska-rasijskim pahadnieńniem staŭki ekspartnych pošlin na naftu i naftapradukty ŭ Biełarusi ŭstanaŭlivajucca ŭ pamiery, roŭnym staŭkam, što prymianiajucca ŭ Rasii. Uvodzicca ŭ dziejańnie jany pavinny ŭ tyja ž terminy, što i staŭki, jakija ŭstanaŭlivajucca adpaviednymi narmatyŭnymi pravavymi aktami Rasijskaj Fiederacyi.
Zhodna ź biełaruska-rasijskimi damoŭlenaściami pošlina na naftu, jakaja pastaŭlajecca ŭ Biełaruś z Rasii, u 2008 hodzie raźličvajecca z prymianieńniem kaeficyjenta 0,335. Takim čynam, z 1 listapada jana składaje dla Biełarusi $96,2 za 1 t.
