Niečakana stała viadoma pra pavieličeńnie terminu biaźvizavaha znachodžańnia dla zamiežnikaŭ u Biełarusi da 30 dzion.
Heta adbyłosia absalutna raptoŭna, bo raniej havorka viałasia pra mahčymaje pavieličeńnie terminu tolki da 10 dzion dla tych, chto prylataje ŭ Biełaruś praz aeraport «Minsk-2» i vylataje adtul ža.
Čym vyklikany taki krok? «Naša Niva» spytała pra heta ŭ staršyni mižnarodnaj kamisii Pałaty pradstaŭnikoŭ Valeryja Varanieckaha.
Fota Siarhieja Hudzilina.
«Padaŭžeńnie terminu znachodžańnia — heta śviedčańnie adkrytaści Biełarusi. Zroblena heta dla pašyreńnia kantaktaŭ miž ludźmi i pavieličeńnia turyzmu. Dla mianie heta nie stała niečakanaściu, bo jak tolki było pryniata rašeńnie ab piacidzionnym biaźvizie, adrazu ž pačałasia rabota pa pavieličeńni hetaha terminu. Pra heta kazali i prezident, i MZS», — skazaŭ Varaniecki.
My nahadali jamu, što raniej padobny krok vyklikaŭ niervovuju reakcyju ŭ Rasii — u Maskvie kazali, što praź Biełaruś da ich mohuć trapić navat terarysty. Praz hetuju pryčynu rasiejcy navat pačali abstaloŭvać pahraničnyja punkty. Ci nie budzie tak i ŭ hety raz?
«Ja dumaju, što niervovych reakcyj nie budzie. Prajšoŭ dastatkovy čas dla taho, kab acanić efiekty piacidzionnaha bieźvizu. Nijakich prablem heta nie stvaryła», — skazaŭ dypłamat.
Ale ci možna čakać niejkich krokaŭ u adkaz? Naprykład, ad ES?
«Jeŭrasajuz pavinien byŭ by daŭno ŭvieści taki ž samy režym, jaki dziejničaje ŭ toj ža Hruzii i Rasii [tam adkryćcio šenhienskaj vizy kaštuje 30 jeŭra zamiest 60 jeŭra u nas — Red.]. Ale, na žal, ES — vielmi biurakratyčnaja stuktura, im treba šmat času, kab ažyćciavić niejkaje rašeńnie», — padsumavaŭ Varaniecki.
