Ceny na miasa ptuški vyraśli praktyčna na tracinu. U MARH ličać, što dla rostu cenaŭ niama nijakich padstavaŭ, i pravodziać antymanapolnaje rasśledavańnie. Pra heta zajaviŭ namieśnik kiraŭnika Ministerstva antymanapolnaha rehulavańnia i handlu Ivan Viežnaviec u efiry telekanała «Biełaruś 1».
«Ceny na miasa ptuški istotna vyraśli, pryčym za košt rostu cany vytvorcaŭ. Pry tych ža samych handlovych nadbaŭkach vytvorcy pavialičyli canu i pry hetym admianili źnižki, jakija raniej davalisia», — zajaviŭ Ivan Viežnaviec.
Pavodle jaho słoŭ, u šerahu handlovych abjektaŭ cana miasa ptuški vyrasła na 28%. U MARH ličać, što taki istotny rost cenaŭ nieabhruntavany.
«Abjektyŭnych faktaraŭ dla takoha rostu cenaŭ na biahučy momant niama. Kurs staić na miescy, ceny na enierhanośbity nie rastuć, i inšych faktaraŭ, jakija tak by mahli paŭpłyvać na canu, u vytvorcy niama», — ličać u MARH.
U viedamstvie adznačyli, što ŭ chodzie manitorynhu vyśvietliłasia, što siem najbujniejšych vytvorcaŭ ptuški «istotna i ŭ adzin momant» padniali ceny na miasa. Astatnija vytvorcy padciahnulisia za lidarami i padniali ceny da taho ž uzroŭnia.
«Takoje adnačasovaje pavyšeńnie cenaŭ biez abjektyŭnych pryčyn maje ŭsie prykmiety cenavaj zmovy. Na hetym tydni my pačali antymanapolnaje rasśledavańnie ŭ dačynieńni da najbujniejšych vytvorcaŭ miasa ptuški », — dadaŭ namieśnik kiraŭnika MARH
Rasśledavańnie moža zaniać da troch miesiacaŭ, ale, uličvajučy abstaviny, MARH pasprabuje zaviaršyć jaho jak maha chutčej. Kali budu pryznany fakt parušeńnia, to materyjały rasśledavańnia buduć adpraŭlenyja ŭ sud dla pryciahnieńnia subjektaŭ da administracyjnaj adkaznaści. Maksimalny pamier štrafu moža skłaści da 10% ad hadavoj vyručki.
