Viarchoŭny sud Biełarusi pakinuŭ bieź źmianieńniaŭ pryhavor hramadzianinu ZŠA Emanuiłu Zielceru. Kasacyjnaja skarha, razhledžanaja 31 kastryčnika, nie zadavolena.
Amierykanski juryst Emanuił Zielcer i jaho sakratar Uładlena Funk byli zatrymany 12 sakavika hetaha hoda ŭ Nacyjanalnym aeraporcie «Minsk».
11 žniŭnia za vykarystańnie zaviedama padmannych dakumientaŭ i zamach na kamiercyjny špijanaž E.Zielcer byŭ pryhavorany da troch hadoŭ pazbaŭleńnia voli, U.Funk — da adnaho. Aboje nastojvajuć na svajoj nievinavataści.
E.Zielceru taksama inkryminavałasia kantrabanda narkatyčnych srodkaŭ. Adnak sud apraŭdaŭ jaho, nie pryznaŭšy narkotykami tabletki, jakija juryst prymaje apošnija 15 hadoŭ.
Pieršapačatkova pasiadžeńnie Viarchoŭnaha suda pa razhladzie kasacyjnaj skarhi Zielcera było namiečana na 26 vieraśnia, adnak jaho pieranieśli, pakolki sudu spatrebilisia «dadatkovyja dakumienty». Jak paviedamiŭ BiełaPAN advakat Dźmitryj Haračka, pa dadatkovyja dakumienty da jaho nichto nie źviartaŭsia.
Ułady ZŠA dabivajucca vyzvaleńnia Zielcera ź mierkavańniaŭ humannaści, pakolki zdaroŭje jurysta prykmietna pahoršyłasia ŭ źniavoleńni biez prapisanych lečačym uračom preparataŭ. U žniŭni pasolstva ZŠA pradastaviła biełaruskim uładam usie nieabchodnyja leki, adnak jany nie byli pieradadzieny E.Zielceru. Miž tym naležny miedycynski dohlad za Zielceram nazvany adnoj z klučavych umoŭ narmalizacyi amierykana‑biełaruskich adnosinaŭ.
Na hetym tydni advakackaja firma Patton Boggs, klijentam jakoj źjaŭlajecca E.Zielcer, źviarnułasia ŭ Mižnarodny valutny fond z zaklikam nie vydavać Biełarusi reziervovy kredyt, jaki zapytvaje biełaruski Nacbank, datul, pakul amierykanski juryst znachodzicca ŭ turmie. Anałahičny zvarot nakiravała ŭ MVF pravaabarončaja arhanizacyja «Frydam Chaus».
