Fota Dźmitryja Bruško
U MZS Biełarusi atrymali notu MZS Litvy i rychtujuć adkaz. Pra heta zajaviŭ aficyjny pradstaŭnik MZS Biełarusi Dźmitryj Mirončyk, piša Tut.by.
«Vyčarpalny kamientar pa dadzienaj situacyi ŭžo byŭ dadzieny MNS i Minenierha Biełarusi. Tamu vidavočna, što infarmacyja ab niejkim «pažary» i zdahadki byli śpiecyjalna prymierkavanyja da hadaviny trahičnaj katastrofy na ČAES i vykarystoŭvajucca ŭ adkryta palityčnych i prapahandysckich metach», — adznačyŭ Dźmitryj Mirončyk.
Aficyjny pradstaŭnik MZS Biełarusi taksama paviedamiŭ, što ŭ viedamstvie atrymali notu litoŭskaha boku.
«Nakiravali zvarot MZS Litvy ŭ kampietentnyja biełaruskija struktury i apieratyŭna padrychtujem aficyjny adkaz», - paabiacali ŭ MZS.
26 krasavika, u hadavinu čarnobylskaj trahiedyi, u MZS Litvy vyklikali pasła Biełarusi Alaksandra Karala. Jamu ŭručyli notu z prośbaj pradastavić padrabiaznuju infarmacyju pra incydent, jaki adbyŭsia 17 lutaha na BiełAES.
Napiaredadni antyjadzierny aktyvist Mikałaj Ułasievič paviedamiŭ, što 17 lutaha ŭ sistemie avaryjnaj abarony reaktara na AES adbyłosia ŭzharańnie padčas vyprabavalnaha zapusku abstalavańnia sistemy avaryjnaj abarony reaktara. BiełAES i MNS abvierhli fakt pažaru. Pa dadzienych viedamstvaŭ, havorka idzie ab karotkim zamykańni na časovym siłavym kabieli, jakaja harantuje elektrazabieśpiačeńnie viežavaha krana.
