Siońnia, 4 sakavika, padčas bijatłonnaha zabiehu z alimpijcami, prezident Biełarusi stralaŭ nie sa stanovišča ležačy, jak spartoŭcy, a sa śpiecyjalnaha prystasavańnia. Hety momant trapiŭ u repartaž telekanała ANT:
Ciažka skazać, čamu spatrebiłasia takaja padstaŭka. Prezidenckaja pres-słužba nikoli nie kamientuje takich pytańniaŭ.
Pres-słužba paviedamiła, što razam z kiraŭnikom dziaržavy na łyžnuju trasu vyjšli jahony małodšy syn Mikałaj, pres-sakratarka prezidenta Natalla Ejsmant, pieramožcy i pryziory Alimpijskich hulniaŭ u Pchiončanie Darja Domračava, Iryna Kryŭko, Dzinara Alimbiekava, a taksama čempijon minułych hadoŭ Alaksiej Ajdaraŭ i eks-himnastka Ksienija Sankovič.
«Heta była naša supolnaja ideja. My damovilisia, što narod pavinien ich ŭbačyć paśla hetaj bliskučaj pieramohi. Ale ja chiba moh zastacca ŭ baku jak samy vialiki zaŭziatar? — cytuje Alaksandra Łukašenku pres-słužba. — Heta prykład taho, što sportam treba zajmacca, asabliva łyžami. Paviercie, ja zajmajusia mnohimi vidami sportu, ale hety samy karysny, asabliva dla mužykoŭ».
Alaksandr Łukašenka adznačyŭ, što sport dla jaho jak narkotyk, i ŭzimku jon zaŭsiody imkniecca stać na łyžy i pravieści treniroŭku. «Kali zaniaty, pozna ŭviečary prychodžu, dapuścim, u 10—11 hadzin, usio roŭna choć by kiłamietraŭ 7—8 ja pavinien prabiehčysia na łyžach. A kali vypadaje bolš času, my pa 2—3 hadziny biehajem pa łyžnaj trasie», — raspavioŭ kiraŭnik dziaržavy.
Siońnia prachodzili dziciačyja bijatłonnyja spabornictvy «Śniežny snajpier». «Mnie Vakulčyk dakładvaje, što kala tysiačy dzietak u vyniku ŭziali na kantrol. Zaraz pravierym ich fizičny stan, my zakupili dobraje abstalavańnie. Kali baćki pahodziacca i dzieci buduć zdolnyja biehać, jany buduć dobrymi spartoŭcami. A dzieci jość z dobrymi zadatkami», — kanstatavaŭ Alaksandr Łukašenka.
