43-hadovy Aleh Ramanaŭ pryznačany pieršym prarektaram Hrodzienskaha dziaržaŭnaha ŭniviersiteta imia Janki Kupały. Mnohija ŭ Hrodnie ličyli, što Ramanaŭ moža stać i rektaram, ale vybar Łukašenki tady paŭ na historyka Irynu Kiturku.

Aleh Ramanaŭ. Fota pokrovgrodno.org.

Aleh Ramanaŭ. Fota pokrovgrodno.org.

Chto ž taki hety Aleh Ramanaŭ? Pra jaho chodziać vielmi supiarečlivyja vodhuki. Naradziŭsia Ramanaŭ u Hrodnie. Skončyŭ bijałahičny fakultet miascovaha ŭniviersiteta. Zrešty, heta nie pieraškodziła jamu pačać budavać karjeru jak fiłosafu.

Aleh Ramanaŭ — vychavaniec lehiendarnaha zahadčyka kafiedry fiłasofii Časłava Kirviela. Heta adzin z samych adyjoznych prychilnikaŭ «ruskaha śvietu» ŭ Hrodnie. Kirvielu 72 hady. Ad 1981 hoda jon zahadčyk kafiedry fiłasofii Hrodzienskaha ŭniviersiteta. Da hetaha navukoŭca pracavaŭ u Politechničnym instytucie ŭ Kamsamolsku-na-Amury.

Letaś Kirviel napisaŭ u «Biełaruskaj dumcy», što Francišak Skaryna, Jakub Kołas, Vasil Bykaŭ — heta častki ruskaha śvietu. Admietna, što try hady tamu Kirviel na staronkach «BiełDumki» ŭžo vystupaŭ z artykułam «Uschodniesłavianski śviet: kudy iści?», u jakim jon adnios biełaruski narod da ŭschodniesłavianskaj pravasłaŭna-chryścijanskaj cyvilizacyi.

Ramanaŭ navat publikavaŭsia niamała z Kirvielem, jon pieraniaŭ jahonyja pohlady adnosna taho, što biełarusy — heta častka ŭschodniesłavianskaj cyvilizacyi.

U 2014 hodzie Aleh Ramanaŭ adnačasova vydaŭ dźvie manahrafii. Adnu ŭ Hrodnie pad nazvaj «Uschodniesłavianskaja cyvilizacyja ŭ haryzoncie adkrytaj historyi». Druhuju ŭ niamieckim Saarbrukienie — «Uschodniejeŭrapiejskaja cyvilizacyja i hłabalnaja dynamika». Knihi praktyčna identyčnyja pa źmieście. Niamieckaje vydaviectva LAMBERT Academic Publishing admietnaje tym, što za hrošy vydaje biez redaktury i karektury ruskamoŭnyja manahrafii.

U nazvach pracaŭ Aleha Ramanava Biełaruś faktyčna nie hučyć, vodhuki iduć vyklučna da «ŭschodnich słavian» ci Rasii. Voś niekatoryja jašče publikacyi hetaha aŭtara: «Impierskaja paradyhma ŭ pierśpiektyvie palityčnaha raźvićcia ŭschodniesłavianskich narodaŭ», «Da prablemy duchoŭna-mientalnych padstaŭ haspadarčaj dziejnaści ŭschodniesłavianskich narodaŭ», «Madernizacyjnaja stratehija ŭschodniesłavianskich hramadstvaŭ: suśvietny vopyt i cyvilizacyjnaja śpiecyfika», «Ruskaja fiłasofija ŭ duchoŭnym vopycie uschodniesłavianskich narodaŭ: minułaje, sučasnaść, budučynia», «Sacyjalnyja ideały ŭschodniesłavianskich narodaŭ jak adkaz na vykliki hłabalizacyi» i h.d.

Siarhiej Hierman, vypusknik mahistratury hrodzienskaha histfaka, dzielicca svaim dośviedam stasavańnia z Aleham Ramanavym: «Čałaviek vielmi saviecki, z «pravasłaŭjem hałaŭnoha mozhu», prabačcie, budu kazać hruba. Tam usia kafiedra takaja. Adzin ź lubimych tvoraŭ Ramanava — heta «Ludzi na bałocie». Na zaniatkach jon škaduje ab razvale Savieckaha Sajuza, što razvalili takuju vialikuju impieryju, dzie my byli pad ehidaj Rasii-matuški».

«Usie čakali, što jon stanie rektaram. Ale ŭ budučyni jon spakojna moža stać i rektaram. Apranaŭsia jon spakojna: džynsy, švedar. U pryvatnych adnosinach nie skazać, što jon niepryjemny čałaviek, ale pohlady jahonyja vielmi svojeasablivyja. Napadaŭ na lekcyjach i na demakratyčnuju častku hramadstva.

Kali kazać pra jahonaha nastaŭnika Kirviela, to, kali ja zdavaŭ ekzamien jamu pa-biełarusku, to mianie nazyvali «prydurkam», kazali, što pravilna zrabili, kali vyhnali vykładčykaŭ z histfaka. Kazali, što «čornaja arystakratyja» kiruje ŭsim śvietam. «Ja nie skažu vam kankretnyja imiony, bo heta moža być niebiaśpiečna dla vašaha žyćcia, ale ja ich viedaju», — kazaŭ Kirviel. Jany pracujuć, pišuć, vykładajuć. Heta takaja historyja, staraja jak śviet».

U studzieni Alaksandar Łukašenka ŭručyŭ dypłom doktara navuk Alehu Ramanavu. Časta sustrečy z Aleham Ramanavym ładziacca ŭ chramie śviaciciela Łuki Krymskaha ŭ Hrodnie.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?