Słučak uźniaŭ hetuju temu jašče ŭ lipieni 2017 hoda, kali stvaryŭ anłajn-pietycyju za toje, kab była ŭviedzienaja administracyjnaja adkaznaść za piśmovy adkaz nie na movie zvarotu ŭ miežach Zakona «Ab zvarotach hramadzian i jurydyčnych asob».
Ihar Słučak.
Siońnia situacyja vyhladaje tak. U artykule 9.13 zakona ŭkazvajecca, što piśmovyja adkazy dajucca na movie zvarotu. Ale nijakaj adkaznaści za parušeńnie hetaj normy nie praduhledžana. To bok možna adkazvać nie na movie zvarotu absalutna biespakarana. I ŭžo byli padobnyja precedenty.
Kali Słučak sprabavaŭ pryciahnuć da administracyjnaj adkaznaści za adkaz pa-rusku na biełaruskamoŭny zvarot futbolny kłub «Smalavičy-STI», u jaho ničoha nie atrymałasia.
Jak reziumavała kiraŭnik spravami Smalavickaha rajvykankama, štraf (ad 4 da 10 bazavych vieličyń) praduhledžany tolki za kankretny pieralik parušeńniaŭ, takich jak admova ad razhladu ci niesvoječasovy adkaz. A pra movu — ni słova.
Z toj ža pryčyny i Kobrynski rajvykankam admoviŭ u pryciahnieńni da administracyjnaj adkaznaści rajonnuju arhanizacyja abarony pravoŭ spažyŭcoŭ, jakaja palenavałasia napisać adkaz pa-biełarusku.
Niekalki hadoŭ tamu słužboŭcaŭ možna było pryciahvać da adkaznaści pa tym samym artykule 9.13. Naprykład, paśla zajavy Hleba Łabadzienki byŭ aštrafavany dyrektar ŽESa. Adnak paźniej hety artykuł kankretyzavali i raśpisali, što mienavita źjaŭlajecca parušeńniem. I siarod prykładaŭ nie akazałasia «adkazu nie na movie zvarotu».
U kastryčniku 2017 hoda Ihar Słučak dasłaŭ elektronny zvarot Pastajannaj kamisii Pałaty pradstaŭnikoŭ, dzie źviartaŭ uvahu na prabieł u zakanadaŭstvie i abhruntoŭvaŭ, čamu jaho treba zapoŭnić. Dniami Ihar atrymaŭ adkaz, u jakim havorycca, što prapanova słušnaja i budzie ŭličanaja.
«Na dumku Kamisii, Vaša prapanova nakont uviadzieńnia administracyjnaj adkaznaści za «adkaz na piśmovy zvarot nie na movie zvarotu» zasłuhoŭvaje ŭvahi i realizacyi. U suviazi z hetym Kamisija ŭ miežach svajoj kampietencyi zrobić nieabchodnyja kroki dla ŭliku Vašaj inicyjatyvy pry padrychtoŭcy kompleksnych prapanoŭ pa ŭdaskanaleńni zakanadaŭstva ab zvarotach hramadzian i jurydyčnych asob», — zaznačajecca ŭ liście.
