Adny mašyny zahłuchli ŭ niekalkich mietrach ad AZS, inšyja paśpieli adjechać i zahłuchli na trasie. Pra heta raspaviała žycharka Hrodna, čyja mašyna paciarpieła ŭ toj dzień.
«Ja pryjechała na zapraŭku ŭ 14.50. Zapraviŭšysia 95-m bienzinam, ja adjechała. Prajechała mietraŭ sto ŭ napramku vyjezdu i zrazumieła, što jechać mašyna admaŭlajecca. Pryblizna ŭ čatyrochstach mietrach znachodziłasia aŭtastajanka, kudy ja ź ciažkaściu, ale dajechała. Mašyna drynčała, tuzałasia i była hatova voś-voś zahłuchnuć. Padjechaŭšy na stajanku i zahłušyŭšy ruchavik, ja vyrašyła zavieści mašynu jašče raz, ale heta ŭžo było biessensoŭna, mašyna zahłuchła całkam», — raspaviała Natalla.
Dziaŭčyna padumała, što sprava ŭ palivie, bo da AZS mašyna jechała biez prablem, i vyrašyła viarnucca na zapraŭku, kab udakładnić, ci mahli supracoŭniki pamylicca i pierabłytać. Tam joj skazali, što ŭsio ŭ paradku i što nichto nie źviartaŭsia z padobnymi skarhami.
Mašynu vyrašana było pakinuć kala aŭtaservisu, što znachodziŭsia niepadalok.
«Uviečary mužu patelefanavali z DAI i paćvierdzili, što supracoŭniki zapraŭki pierabłytali cysterny i zamiest 95-ha bienzinu zalili dyzpaliva. Paraili źviarnucca na zapraŭku dla dalejšych raźbiralnictvaŭ, bo nie my adny apynulisia ŭ śpisie paciarpiełych. To bok nie «Biełarusnafta», a DAI abzvońvała aŭtaŭładalnikaŭ z vybačeńniami i prapanovaj usio vypravić», — ździŭlajecca haradzienka.
Na zapraŭcy ŭsim aŭtaŭładalnikam, u bienzabaki jakich trapiła salarka zamiest bienzinu, skazali, što kampiensujuć škodu paśla dyjahnostyki na STA, jakuju admysłova adkryli dla tych, chto paciarpieŭ ad pamyłki supracoŭnikaŭ AZS u toj dzień.
«Pakazali śpis paciarpiełych aŭto, jakich na toj momant apynułasia 27, i rekamiendavali vyklikać evakuatar i adpravić aŭtamabil na servis, dzie praviaduć poŭny źliŭ paliva i pračystku baka», — praciahvaje Natalla. — Darečy, paciarpiełym aŭtaŭładalnikam supracoŭniki «Biełarusnafty» rekamiendavali paznačyć u zvarocie na aŭtaservis «niajakasny vid paliva». To bok pra toje, što byŭ zality nie toj vid paliva, jany vyrašyli nie papiaredžvać».
Karespandent Newgrodno.by źviazaŭsia ź jašče adnym klijentam AZS, čyja mašyna hetak ža paciarpieła ad chałatnaści supracoŭnikaŭ AZS №68.
«Mnie na zapraŭcy prapanavali vyklikać evakuatar i jechać na STA da hrodzienskaha miasakambinata, kudy adpraŭlali ŭsie paciarpiełyja ŭ toj dzień mašyny. Apłacić usio, naturalna, samastojna, a zatym z čekam jechać u hałoŭny ofis «Biełarusnafty» — dla dalejšaj kampiensacyi. Pračystka paliŭnaj sistemy na hetym STA doŭžyłasia nie bolš za 40 chvilin, pryčym biez dakumientaŭ i naležnaha afarmleńnia. Ja pajechaŭ na inšuju stancyju dyjahnostyki. Spačatku napiaredadni śviataŭ, a ciapier i na sami śviaty ja zastaŭsia biez mašyny. Kiraŭnictva zapraŭki vusna vybačyłasia za niazručnaści. Ale maralnuju škodu: stračanyja hrošy, čas, niervy i «nastupstvy» pracy ruchavika na takim «kaktejli» nichto, pa ŭsioj bačnaści, kampiensavać, jak ja zrazumieŭ, nie źbirajecca», — aburajecca małady čałaviek.
Supracoŭniki AZS svaju vinu ŭ incydencie pryznali, paćvierdziŭšy, što zamiest bienzinu ŭ toj dzień zalivali dyzielnaje paliva.
