Prezident Hvatemały Džymi Marales abviaściŭ, što ambasada hetaj centralnaamierykanskaj krainy ŭ Izraili budzie pieraniesiena z Tel-Aviva ŭ Ijerusalim. Adpaviednaja zajava apublikavana ŭ noč na 25 śniežnia na aficyjnaj staroncy prezidenta ŭ fejsbuku, paviedamlaje DW.
Takim čynam, Hvatemała stała pieršaj krainaj, jakaja padtrymała zajavu prezidenta ZŠA Donalda Trampa ab pryznańni Ijerusalima stalicaj Izraila.
Marales zaznačyŭ, što daručyŭ ministru zamiežnych spraŭ Sandry Choviel arhanizavać pieranos ambasady Hvatemały ŭ Ijerusalim, adnak nie nazvaŭ kankretnych terminaŭ. Da takoha rašeńnia prezident pryjšoŭ paśla razmovy z premjer-ministram Izraila Bińjaminam Nietańjachu.
Napiaredadni Marales napisaŭ u tvitary, što Izrail źjaŭlajecca važnym supracoŭnikam Hvatemały, a tamu kraina pavinna jaho padtrymlivać.
Hvatemała była adnoj ź dzieviaci krain, jakija prahałasavali suprać pryniaćcia Hienasamblejaj AAN rezalucyi, jakaja zaklikaje ZŠA pierahledzieć rašeńnie ab pryznańni Ijerusalima stalicaj Izraila. Za pryniaćcie dakumienta prahałasavali 128 dziaržaŭ.
