«Naša Niva» zaŭsiody nadzialała šmat uvahi biełaruskim čynoŭnikam. Heta ludzi, jakija svaimi inicyjatyvami i rašeńniami ŭpłyvajuć na žyćcio kožnaha žychara krainy.
U mnohich krainach śvietu (u tym liku ŭ susiednich Rasii i Ukrainie) čynoŭniki i ich siemji musiać publikavać svaje dekłaracyi dachodaŭ, bo atrymlivajuć zarobki ź dziaržaŭnaha biudžetu. U Biełarusi takoha abaviazku niama, žyćcio čynoŭnikaŭ — zakrytaja śfiera.
Adnak hramadzianie Biełarusi majuć prava viedać, jak žyvuć pradstaŭniki namienkłatury i ich siemji.
U tradycyjnym artykule «Naša Niva» sistematyzuje infarmacyju pra dziaciej kala 30 top-čynoŭnikaŭ.
Pieradusim my brali dla vyvučeńnia asobaŭ ź vierchnich pazicyj našaniŭskaha rejtynhu «Top-100 samych upłyvovych biełarusaŭ».
My šukali adkazy na dva asnoŭnyja pytańni: dzie vučylisia i dzie pracujuć ciapier dzieci čynoŭnikaŭ. Infarmacyja pieradusim šukałasia ŭ sacyjalnych sietkach.
U atrymanym śpisie jość roznyja ludzi — niekaha zavabiła dziaržaŭnaja słužba, jak i ich baćkoŭ, chtości pracuje ŭ pryvatnym biznesie. A niekatoryja jašče tolki chodziać u škołu i abirajuć svoj žyćciovy šlach.
Alaksandr Łukašenka, kiraŭnik Biełarusi
Ni dla kaho ŭ Biełarusi nie sakret, što ŭ kiraŭnika dziaržavy troje synoŭ.
Alaksandr, Mikałaj, Viktar, Dźmitryj Łukašenki. Fota sb.by
Viktar, vypusknik fakulteta mižnarodnych adnosinaŭ BDU, ad 2005 hoda zajmaje pasadu pamočnika prezidenta pa pytańniach biaśpieki.
Tamsama vučyŭsia i Dźmitryj. Jon uznačalvaje Prezidencki spartovy kłub — dziaržaŭna-hramadskaje abjadnańnie, jakoje dapamahaje spartsmienam, ale maje i ŭłasnyja biznes-intaresy.
Narešcie, Mikałaj pa-raniejšamu školnik, vučycca ŭ 7 kłasie Astrašycka-Haradockaj siaredniaj škoły.
* * *
Valeryj Vakulčyk, staršynia KDB
27-hadovaja dačka kiraŭnika śpiecsłužby na staronkach u sacyjalnych sietkach paznačyła, što vučyłasia ŭ licei №1 ŭ staličnym mikrarajonie Paŭdniovy-Zachad, a paśla skončyła Biełaruski dziaržaŭny ekanamičny ŭniviersitet.
Pa infarmacyi «Našaj Nivy», ciapier Aksana Vakulčyk zajmajecca markietynham u kampanii BeCloud — heta apieratar, jaki praz pravajdaraŭ MTS i «Łajf» pradastaŭlaje biełarusam dostup da 4G-internetu.
* * *
Viktar Łukašenka, pamočnik prezidenta pa pytańniach biaśpieki
Viktar — šmatdzietny tata, u jaho i žonki Lilii čaćviora dziaciej.
Dačka Viktoryja skončyła staličnuju himnaziju №16 i ŭśled za baćkam pajšła na fakultet mižnarodnych adnosinaŭ BDU. Śpiecyjalnaść druhakurśnicy Viktoryi — «suśvietnaja ekanomika». Na biaspłatnaje adździaleńnie dziaŭčynie prabicca nie ŭdałosia, tamu za navučańnie davodzicca płacić.
Fota z archivu Viktoryi było apublikavana partałam Tut.by
Synu Alaksandru 13 hadoŭ. Na staronki ŚMI jon traplaŭ tolki kali vyjhraŭ Kaladny turnir pa spartyŭna-bajavych adzinaborstvach na pryzy mitrapalita Fiłareta.
Jašče adnoj dačce, Valeryi, pakul što 8 hadoŭ, a mienšamu Jarasłavu tolki 4 hady.
Siamja padčas udziełu ŭ akcyi «Našy dzieci», śniežań 2016.
* * *
Andrej Kabiakoŭ, premjer-ministr
Dačka čynoŭnika vučyłasia na hieałahičnym fakultecie MHU, kali jon pracavaŭ u Maskvie. Viera Kabiakova zavočna atrymała dypłom pryborabudaŭničaha fakulteta BNTU. Apošni raz jana fihuravała ŭ jakaści hałoŭnaha śpiecyjalista-ekśpierta u «BPS-Śbierbank». Dziaŭčyna pastajanna vykładaje ŭ sacyjalnyja sietki sełfi z centra Minska.
Viera Kabiakova. Fota vk.com
Syn Hieorhij vyrašyŭ stać prahramistam. Jon vučycca na druhim kursie prestyžnaha fakulteta radyjofiziki i kampjutarnych technałohij BDU. Letaś chłopiec pastupiŭ na biaspłatnaje adździaleńnie, nabraŭšy 325 z 400 mahčymych. CT pa fizicy Hieorhij zdaŭ na 73 bały, pa matematycy — na 81 bał, a pa ruskaj movie — 78 bałaŭ. Adpaviedna, siaredni bał atestata składaŭ 9,3 bała.
Hieorhij Kabiakoŭ. Fota vk.com
* * *
Uładzimir Makiej, ministr zamiežnych spraŭ
Starejšy syn ministra zamiežnych spraŭ, Vital, pracuje pad kiraŭnictvam baćki. Jon — namieśnik načalnika Upraŭleńnia ekanamičnaha supracoŭnictva i ŭstojlivaha raźvićcia ŭ Hałoŭnym upraŭleńni šmatbakovaj dypłamatyi Ministerstva zamiežnych spraŭ.
Vital Makiej. Fota mfa.gov.by
Vital Makiej viarnuŭsia ŭ Biełaruś ź Ńju-Jorka razam z žonkaj Marharytaj i dačkoj Maryjaj. Syn ministra byŭ daradcam pa ekanamičnych i ekałahičnych pytańniach u pradstaŭnictvie Biełarusi pry AAN, a jašče raniej Vital pracavaŭ pieršym sakratarom pasolstva Biełarusi ŭ Aŭstryi.
Ad druhoha šlubu z aktrysaj Vieraj Palakovaj-Makiej u ministra raście syn Arciom. Jon chodzić u treci kłas.
Michaił Miaśnikovič, śpikier Savieta Respubliki
Saviet respubliki ličycca prytułkam dla namienkłaturnych piensijanieraŭ, ale Miaśnikovič sprabuje ŭpłyvać na pracesy ŭ hramadstvie i adtul.
Vyhladaje, što dzieci śpikiera nie karystajucca sacyjalnymi sietkami. Peŭnaj infarmacyi pra ich miesca pracy niama.
Krynicy «Našaj Nivy» źviazvali starejšuju dačku čynoŭnika, Volhu, ź mižnarodnym handlem u śfiery chimikataŭ. Ale my nie znajšli paćviardžeńnia hetaj infarmacyi.
Małodšaje dzicia Miaśnikoviča, 37-hadovy syn Dźmitryj, zakončyŭ u Minsku suvoraŭskaje vučylišča. Užo ŭ 1990-ja, u časy niezaležnaści, jon pastupiŭ u akademiju FSB u Maskvie. Karjera ŭ siłavych strukturach była niadoŭhaj, Dźmitryj syšoŭ u biznes. Čutki ŭ internecie źviazvali jaho z horna-chimičnaj halinoj i pracaj u Turkmienistanie ŭ sumiesnym pradpryjemstvie.
Čytajcie taksama: Raźvitańnie z premjer-ministram. «Miaśnikovičy nikoli ŭ KDB pracavać nie buduć!» (2011 hod)
* * *
Ihar Šunievič, ministr unutranych spraŭ
Ab pryvatnym žyćci ministra ŭnutranych spraŭ infarmacyi niebahata. Z pryvatnaha jon siabie prajaviŭ, tolki kali na 9 Maja apranuŭ formu NKVD — darečy, chvaliŭsia, što pašyŭ za svaje hrošy, — i razam z žonkaj, jakaja karystajecca ahulnavajskovaj formaj časoŭ Druhoj suśvietnaj, kataŭsia pa Minsku na rarytetnym aŭtamabili.
Jak stała viadoma «NN», u siamji raście piacihadovaja dačka Varvara.
* * *
Viktar Šejman, kiraŭnik spraŭ prezidenta
34-hadovy Siarhiej Šejman, starejšy syn niepataplalnaha kiraŭnika spravami prezidenta, — vypusknik pryvatnaha Mižnarodnaha humanitarna-ekanamičnaha instytuta.
«Atrymaŭ dypłom jurysta. Užo ŭ 23 hady jon pracavaŭ hałoŭnym kantraloram-revizoram pry Minskim abłvykankamie. Akramia taho Siarhiej Šejman byŭ adnym z arhanizataraŭ kancertaŭ «Za Biełaruś!». U pryvatnaści, vyrašaŭ pytańni achovy, kantaktavaŭ z zorkami, zaćviardžaŭ prahramy kancertaŭ», — adznačaŭ karespandent «NN» u artykule pra dziaciej siabroŭ Łukašenki. Šejmana-małodšaha ciapier viedajuć jak biznesmiena.
Jaho 28-hadovaja siastra Volha skončyła toj samy instytut. A niadaŭna pajechała vučycca ŭ ZŠA, va ŭniviersitet Kapłan u štacie Ajova.
Na fota adrazu dźvie Volhi Šejman. Źleva — dačka Viktara Šejmana, sprava — žonka Siarhieja Šejmana.
* * *
Pavieł Kałaŭr, staršynia praŭleńnia Nacbanka
U siamji «Čałavieka hoda — 2017» dvoje synoŭ.
Starejšamu Alaksieju niadaŭna spoŭniŭsia 31 hod. Jon advučyŭsia ŭ škole z pahłyblenym vyvučeńniem zamiežnych movaŭ, a paśla pastupiŭ u BDEU.
Fota z fejsbuka
Na praciahu šaści hadoŭ Alaksiej Kałaŭr pracavaŭ u bankaŭskaj śfiery, niejki čas u Rasii, ale pieravažna ŭ struktury «BPS-Śbierbanka». Apošniaja jaho pasada — namieśnik načalnika adździeła raźvićcia karparatyŭnaha biznesu.
A miesiac tamu syn staršyni Nacbanka pierajšoŭ na pracu ŭ kampaniju Epam na pazicyju viadučaha biznes-analityka.
Jahony małodšy brat Uładzimir taksama vypusknik BDEU. I jon taksama doŭhi čas pracavaŭ «BPS-Śbierbanku».
Ciapier Uładzimir pradstaŭleny ŭ sacsietkach jak namieśnik dyrektara departamienta stratehičnych inavacyj i ličbavaha biznesu «Banka BiełVEB». Heta toj bank, jakim kiravaŭ jahony baćka da svajho viartańnia ŭ Nacbank.
Fota z fejsbuka
Čytajcie taksama. Self-made man: historyja pośpiechu Paŭła Kałaŭra, repartaž ź jaho małoj radzimy
* * *
Uładzimir Siamaška, vice-premjer
Hałoŭny hazavy pieramoŭščyk krainy — čałaviek starejšaha vieku. Znajści ŭ sacsietkach jaho dziaciej nie ŭdałosia.
«Ja tolki rady, što maja starejšaja dačka ceły hod advučyłasia ŭ Anhlii, — raskazvaŭ niekali Siamaška «Narodnaj voli». — U jaje dźvie vyšejšyja adukacyi, jana paśpiachova skončyła Biełaruski dziaržaŭny univiersitet — fakultet matematyki, potym «narhas».
Ja navat chacieŭ, kab jana adčuła žyćcio ŭ Anhlii, paraŭnała ŭzrovień adukacyi. Darečy, jaje paraŭnańni nie ŭ karyść Kiembrydža. Jana viarnułasia z Anhlii i pracuje ŭ Minsku. Skazała, što nikoli ŭ žyćci ź Biełarusi nie źjedzie…».
* * *
Alaksandr Kaniuk, hienieralny prakuror
U siamji Alaksandra i Śviatłany Kaniukoŭ u 2004 hodzie adbyłasia trahiedyja — zahinuŭ starejšy syn Uładzimir.
Małodšamu Dźmitryju ciapier 29 hadoŭ. Chłopiec skončyŭ jurydyčny fakultet BDU, niekalki hadoŭ pasprabavaŭ siabie ŭ jurysprudencyi, ale ŭ vyniku pajšoŭ u śfieru infarmacyjnych technałohij.
Dźmitryj Kaniuk, fota z fejsbuka
Dźmitryj — mieniedžar u minskim ofisie IT-kampanii PandaDoc. Hety startap biełaruskich chłopcaŭ pryciahnuŭ bolš za 20 miljonaŭ ad zamiežnych inviestaraŭ. Aproč taho, syn hienieralnaha prakurora praktykuje jak biznes-trenier.
* * *
Andrej Raŭkoŭ, ministr abarony
Dačka ministra Julija vučyłasia ŭ Ekanamičnym univiersitecie. Jana haduje małuju dačku. Chobi Juli — vyrab upryhožvańniaŭ ź lamcu.
fota vk.com
Čytajcie taksama: «Byłych kramloŭcaŭ nie byvaje». Piać faktaŭ pra novaha ministra abarony Andreja Raŭkova
* * *
Mikałaj Snapkoŭ, namieśnik kiraŭnika Administracyi prezidenta
U čynoŭnika, jaki vyznačaje ŭ Administracyi prezidenta raźvićcio ekanomiki, dva syny.
Starejšy — 28-hadovy Illa — skončyŭ Biełaruski dziaržaŭny ekanamičny ŭniviersitet. Pavodle infarmacyi ŭ sacsietkach, jon pracuje ŭ adździele markietynhu i damoŭnaj pracy Respublikanskaha centra tyłavoha zabieśpiačeńnia ŭ Ministerstvie pa nadzvyčajnych situacyjach. Illa Snapkoŭ adkazvaje za dziaržaŭnyja zakupki.
Illa Snapkoŭ z žonkaj Stefanijaj. Fota vk.com.
Małodšamu Zacharu 16 hadoŭ. Jon vučycca ŭ staličnaj himnazii. Pa słovach baćki, Zachar sam vyrašyŭ vučyć kitajskuju movu.
* * *
Siamion Šapira, staršynia Fiederacyi chakieja Biełarusi
U byłoha hubiernatara Hrodzienščyny i Minščyny dvoje dziaciej.
Starejšy syn — Andrej — skončyŭ Ekanamičny ŭniviersitet. Jon pracuje ŭ ahrakambinacie «Dziaržynski» namieśnikam hienieralnaha dyrektara pa inavacyjach i turyźmie. U śfiery jaho kantrolu — Centr ekałahičnaha turyzma «Stańkava» i baza adpačynku «Chatava».
Fota vk.com.
Darečy, mienavita z ahrakambinata «Dziaržynski» Šapira-starejšy sychodziŭ na pasadu ministra sielskaj haspadarki.
Dačka Hanna skončyła jurydyčny fakultet Hrodzienskaha dziaržaŭnaha ŭniviersiteta pa śpiecyjalnaści «pravaznaŭstva». Ciapier jana razam z mužam žyvie ŭ Minsku. Jon pa prafiesii doktar.
Fota vk.com
Čytajcie taksama: Libierał, jaki staŭ žandaram. Historyja žyćcia Siamiona Šapiry (2013)
* * *
Natalla Kačanava, kiraŭnica Administracyi prezidenta
U jaje dźvie dački — Volha i Alena.
Volha pastupiła ŭ Biełaruski dziaržaŭny miedycynski ŭniviersitet na śpiecyjalnaść «piedyjatryja». Advučyŭšysia, jana viarnułasia na małuju radzimu razam z mužam, taksama piedyjatram. Volha pracuje ŭ navapołackim raddomie i haduje dvuch dziaciej.
Alena skončyła adździaleńnie zamiežnych movaŭ historyka-fiłałahičnaha fakulteta Połackaha dziaržaŭnaha ŭniviersiteta. Jana paznačyła hety ŭniviersitet jak miesca pracy. Ale najchutčej, Alena znachodzicca ŭ dekretnym adpačynku — maleńkaj dačce Mirasłavie kala hoda.
fota ok.ru
Čytajcie taksama: Historyja žyćcia Natalli Kačanavaj: jak valejbalistka z vodakanała stała samaj vysokapastaŭlenaj žančynaj Biełarusi (2016 hod)
* * *
Ivan Naskievič, kiraŭnik Śledčaha kamiteta
Hałoŭny śledčy — šmatdzietny baćka. U siamji čaćviora dziaciej.
Albina vučycca na fakultecie anhlijskaj movy Minskaha dziaržaŭnaha linhvistyčnaha ŭniviersiteta. Adznačym, što dziaŭčyna ŭ svoj čas była rekamiendavanaja dla zaličeńnia ŭ Rasijski ŭniviersitet družby narodaŭ pa prahramie «Rasijskaha supracoŭnictva», adnak vyrašyła zastacca na radzimie.
Daniła sioleta pastupiŭ na pieršy kurs farmaceŭtyčnaha fakulteta Mieduniviersiteta, pryčym na biudžetnaje navučańnie. Heta značyć, što jon pakazaŭ bliskučyja viedy na CT, bo prachadny bał na hety fakultet kaśmična vysoki.
Mienšy syn čynoŭnika pakul vučycca ŭ siaredniaj škole. Samaj maleńkaj dačce, Maryi, dva hady.
Čytajcie taksama. Cierabličy: repartaž z radzimy novaha kiraŭnika Śledčaha kamiteta i raspovied pra jahonuju siamju FOTY (2015 hod)
* * *
Vasil Maciušeŭski, pieršy vice-premjer
24-hadovy syn Jan idzie šlacham baćki. Hod tamu jon zhadvaŭsia jak mahistrant Instytuta biznesu i mieniedžmientu technałohij BDU.
Čytajcie taksama: Top-mieniedžar ź jeŭrapiejskaj adukacyjaj: historyja žyćcia pieršaha vice-premjera Vasila Maciušeŭskaha (2015 hod)
* * *
Dźmitryj Łukašenka, kiraŭnik Prezidenckaha spartyŭnaha kłuba
U siamji Dźmitryja Łukašenki try dački. Starejšyja Darja i Nastaśsia, a taksama maleńkaja Alaksandra, na zdymku jana na rukach u mamy.
Darja i Nastaśsia niekalki hadoŭ tamu pieramahli ŭ spabornictvie aŭtaraŭ biełaruskamoŭnych kazak, a paśla jašče i ŭ konkursie instrumientalnaj muzyki «Maładyja talenty Biełarusi».
* * *
Maksim Ryžankoŭ, pieršy namieśnik kiraŭnika Administracyi prezidenta
U siamji čynoŭnika raście dačka Uładzisłava, joj 9 hadoŭ.
Čytajcie taksama: Sa sportu ŭ Administracyju prezidenta: piać faktaŭ pra Maksima Ryžankova
Vasil Žarko, vice-premjer
Pra adzinuju dačku čynoŭnika karespandentam «Našaj Nivy» raskazvali svajaki siamji.
Volha skončyła histaryčnaje adździaleńnie bresckaha liceja, a ŭ 2007 pastupiła na fakultet mižnarodnych adnosinaŭ BDU. Padčas vučoby jana vyjšła zamuž i naradziła syna. Praź niekalki hadoŭ u siamji naradziłasia jašče i dačka.
Čytajcie taksama: Pa śladach Pastajałki: jak Vasil Žarko zrabiŭ karjeru ministra achovy zdaroŭja
* * *
Andrej Šorac, staršynia Minharvykankama
U siamji kiraŭnika Minska dvoje małych dziaciej — Ivan i Darja.
* * *
Andrej Uciuryn, pieršy namieśnik dziaržaŭnaha sakratara Rady biaśpieki
24-hadovy Anton Uciuryn ciapier pracuje ŭ śfiery infarmacyjnych technałohij. Jon zajmaje pasadu mieniedžara prajektaŭ u kampanii Itransition. Heta adzin z najbujniejšych raspracoŭščykaŭ prahramnaha zabieśpiačeńnia ŭ Biełarusi, u jakim pracuje bolš za 1500 čałaviek.
Syn byłoha kiraŭnika achovy Alaksandra Łukašenki skončyŭ fakultet mižnarodnych adnosin BDU. Padčas letnich kanikuł jon dvojčy prachodziŭ dadatkovaje navučańnie ŭ Łondanie.
Paśla zakančeńnia vučoby Anton papracavaŭ hod u kampanii «Biełśpiecźnieštechnika», jakaja zajmajecca prodažam zbroi za miažu.
fota z tvitara
* * *
Hienadź Davydźka, staršynia Biełteleradyjokampanii
Dačka Janina skončyła Biełaruski nacyjanalny techničny ŭniviersitet. Miarkujučy pa ankiecie ŭ sacyjalnych sietkach, jana pracuje ŭ «Minskprajekcie».
fota vk.com
Čytajcie taksama: Kniaź Vitaŭt z Kałymy: historyja pośpiechu (ci padzieńnia) Hienadzia Davydźki
* * *
Michaił Rusy, vice-premjer
U jahonaj siamji dźvie dački. Starejšaja, Taćciana, skončyła fakultet technałohii arhaničnych rečyvaŭ Technałahičnaha ŭniviersiteta, a małodšaja Julija vučyłasia na finansista ŭ Ekanamičnym univiersitecie.
Taćciana Rusaja.
Julija Rusaja, fota vk.com
Čytajcie taksama: Historyja žyćcia Michaiła Rusaha, ministra, jaki pierasiedzieŭ usich premjeraŭ
* * *
Uładzimir Kałtovič, ministr antymanapolnaha rehulavańnia i handlu
U siamji ministra dvoje dziaciej. Starejšaja — Alaksandra. Admietna, što na staroncy «Ukantakcie» jana padpisanaja pa-biełarusku (jak, darečy, i jaje muž).
Alaksandra vučyłasia na zavočnym i pracavała ŭ «Handlovym domie «Na Niamizie». Niadaŭna jana naradziła dzicia.
Małodšy syn, Ivan, skončyŭ minskuju himnaziju-kaledž mastactvaŭ, paśla pastupiŭ u Akademiju mastactvaŭ na fakultet dyzajnu i dekaratyŭna-prykładnoha mastactva.
Ivan u centry. Fota Ukantakcie.
Čytajcie taksama: Historyja žyćcia samaha modnaha ministra, jaki moža prasłavicca, uzakoniŭšy biełaruskamoŭnyja etykietki
* * *
Aleś Karlukievič, ministr infarmacyi
Adzinaja dačka Vieranika skončyła Biełaruski dziaržaŭny ŭniviersitet u 2009 hodzie. Joj 31 hod, jana śpiecyjalizujecca na kitajskaj movie. Vykładała ŭ BDU, adkazvała za suviazi z hramadskaściu ŭ hateli «Piekin». Ciapier Vieranika Karlukievič žyvie ŭ Maskvie, dzie pracuje pijar-dyrektarkaj u kitajskaj kampanii «Karparacyja ZTE — Suviaźtechnałohii».
Čytajcie taksama: Piśmieńnik, vajskoviec, udaviec: piać faktaŭ pra ministra infarmacyi Alesia Karlukieviča
* * *
Valeryj Małaška, ministr achovy zdaroŭja
Syn ministra Anton Małaška praciahnuŭ siamiejnuju dynastyju. Jon pracuje chirurham u traŭmatałahičnym adździaleńni Mahiloŭskaj abłasnoj balnicy. Darečy, žonka Antona — taksama miedyk.
Anton Małaška (źleva) i zahadčyk traŭmatałahičnaha adździaleńnia Mahiloŭskaj abłasnoj balnicy Aleh Abialevič (sprava). Foto: mogilevnews.by.
Čytajcie taksama: Piać faktaŭ pra doktara Valeryja Małašku
* * *
Andrej Chudyk, ministr achovy pryrodnych resursaŭ
36-hadovy syn Vadzim — dyrektar kampanii «Lidanaftapradukt». Jon skončyŭ Hrodzienski dziaržaŭny ahrarny ŭniviersitet, pracavaŭ na «Lidachlebapradukcie», paśla staŭ načalnikam zapraŭki ŭ Lidzie. Adtul Chudyk-małodšy pajšoŭ na pavyšeńnie — jon staŭ kuryravać pracu ŭsich zapravak «Hazpramnafty» na Hrodzienščynie. A hod tamu viarnuŭsia ŭ Lidu ŭ jakaści dyrektara naftavaj kampanii. U jaho siamji rastuć dva syny.
Vadzim Chudyk ź siamjoj.
Jašče adzin syn ministra, Mikałaj, vajskoviec.
Čytajcie taksama: Syn — dyrektar pradpryjemstva, brat — načalnik tulskaj palicyi: piać faktaŭ pra novaha ministra pryrody
* * *
Uładzimir Vaščanka, ministr pa nadzvyčajnych situacyjach
Abodva dziciaci hałoŭnaha ratavalnika krainy — Iryna i Dźmitryj — skončyli fakultet ekanomiki i prava Mahiloŭskaha dziaržaŭnaha ŭniviersiteta.
Paśla zaviaršeńnia navučańnia Iryna kala hoda papracavała ŭ mahiloŭskim Pramatamnahladzie i Mahiloŭabłmajomaści. Apošnija 13 hadoŭ jana pracuje ŭ Dziaržpramnahladzie — heta arhanizacyja, padkantrolnaja ministerstvu, jakoje ŭznačalvaje jaje baćka.
Ciapier Iryna Vaščanka zajmaje pasadu načalnika adździeła mižnarodnaha supracoŭnictva i haduje małoha syna.
Iryna Vaščanka. Fota Vk.com
Dźmitryj Vaščanka. Fota Ok.ru
* * *
Čytajcie taksama: Ad Abielskaj da Jarmošynaj: 112 uładalnikaŭ katedžaŭ u Drazdach, poŭny śpis
Čytajcie taksama: Dzie žyvuć i čym zajmajucca dzieci lidaraŭ biełaruskaj apazicyi?
