15-hadovy školnik z Hrodna za dźvie načnych hadziny zdoleŭ skraści dva aŭtamabili, jašče adzin zavieści nie atrymałasia. Vybiraŭ jon mašyny vyklučna vytvorčaści Vołžskaha aŭtazavoda, paviedamlaje uvd.grodno.by.
Pieršyja «Žyhuli» šostaj madeli junak sprabavaŭ skraści kala paŭnočy ŭ piatnicu, ale zapuścić ruchavik nie ŭdałosia. Užo praz hadzinu złamyśnik u susiednim dvary znajšoŭ VAZ-2105, jaki ŭsio-tki skraŭ.
Zhonščyk nie ŭličyŭ toj fakt, što aŭtamabil choć i 1984 hoda vypusku, ale ŭžo byŭ abstalavany błakataram rula. Tamu prajechaŭšy niekalki sotniaŭ mietraŭ, mienavita z-za zaklinavanaha rula chłopiec kinuŭ transpartny srodak pasiarod darohi.
Małady čałaviek padumaŭ, što rul zaklinavała z-za niaspraŭnaści kankretna hetaha aŭto i adpraviŭsia pieššu na novyja pošuki. Kala dźviuch hadzin nočy jon znajšoŭ inšy VAZ-2106. Sahnaŭšy jaho, z-za zabłakavanaha rula jon ździejśniŭ DTZ, najechaŭšy na prydarožnuju kanstrukcyju.
Na ranicu ŭ milicyju stali pastupać zvanki ad žycharoŭ mikrarajona Dzieviatoŭka, što prama pasiarod darohi stajać kinutyja mašyny. Heta byli mienavita tyja «Žyhuli», jakija i zhaniaŭ padletak.
Milicyja zmahła chutka adšukać zhonščyka dziakujučy tamu, što jon vychvalaŭsia ŭ sacyjalnych sietkach svaimi pryhodami.
